Лінкі ўнівэрсальнага доступу

Аналітык: Лукашэнка і Пуцін не дамовіліся

абноўлена

На думку аглядальнікаў Радыё Свабода, і сёньняшняя сустрэча Аляксандра Лукашэнкі і Ўладзіміра Пуціна ня мела пэўнага выніку.

Расейскае агенцтва ТАСС па выніках перамоваў паведаміла, што сустрэча працягвалася за зачыненымі дзьвярыма тры з паловай гадзіны.

Раней сёньня, камэнтуючы сустрэчу двух кіраўнікоў, прэсавы сакратар Уладзімера Пуціна Дзьмітры Пяскоў сказаў, што пра канкрэтныя вынікі перамоў будзе паведамлена "ў выпадку неабходнасьці". Аднак дагэтуль афіцыйнага паведамленьня так і не зьявілася.

Тым часам, сайт прэзыдэнта Расеі яшчэ а 12.30 менскага часу напісаў, што сустрэча ўжо адбылася.

Пазьней стала вядома, што Аляксандр Лукашэнка адмовіўся ад прапановы Ўладзіміра Пуціна згуляць у хакей на Краснай плошчы ў таварыскім матчы «Начной лігі». Паводле слоў прэзыдэнта Расеі ў інтэрвію тэлеканалу «Расея 24», Лукашэнка спаслаўся на тэрміновыя справы ў Менску.

У дзень перамоваў газэта «Московскій комсомолец» пісала, што аб выніках перамоваў можна будзе меркаваць па тым, ці прыме Лукашэнка прапанову Пуціна згуляць у хакей на Краснай плошчы.

29 сьнежня Аляксандар Лукашэнка знаходзіўся з рабочым візытам у Расеі. Лукашэнка і яго расейскі калега мелі намер «працягнуць размову па актуальных пытаньнях беларуска-расейскага супрацоўніцтва, якія бакі падрабязна абмеркавалі ў розных фарматах на сустрэчы ў Крамлі 25 сьнежня».

Прэс-сакратар расейскага лідэра Дзьмітрый Пяскоў заявіў 29 сьнежня, што Крэмль разглядае перамовы прэзыдэнтаў Расеі і Беларусі як чарговы крок у бок саюзніцкіх адносін, але не чакае ад іх прарыўных рашэньняў.

Дракахруст: ніводны бок ня здолеў дамагчыся ад партнэра істотных саступак

Юры Дракахруст
Юры Дракахруст

Юры Дракахруст нагадвае, што падчас перамоваў прэсавы сакратар Пуціна Дзьмітры Пяскоў паведаміў, што прэсавай канфэрэнцыі па выніках сустрэчы ня будзе і заклікаў не чакаць ад перамоваў прарыўных рашэньняў.

«Гэтая зьява Пяскова, — мяркуе Юры Дракахруст, — сьведчыць пра тое, што ніводзін бок ня здолеў дамагчыся ад партнэра колькі-небудзь істотных саступак нават на ўзроўні заяў. Лукашэнка пагадзіўся працягваць перамовы пра паглыбленьне саюзнай інтэграцыі, Пуцін — абмяркоўваць пажаданьні Беларусі аб эканамічнай дапамозе і кампэнсацыях.

І ўсё. Лукашэнка не сказаў, што, напрыклад, гатовы на адзіную валюту, Пуцін — што Беларусі расейскі падатковы манэўр будзе кампэнсаваны хаця б часткова.

Працоўная група на ўзроўні ўрадаў была створаная яшчэ пасьля мінулай сустрэчы, якая прайшла 25 сьнежня. Было дзіўна, калі яе склад з абодвух бакоў зацьвердзіў... прэм’ер Расеі Дзьмітры Мядзьведзеў. Напэўна, фармальна, як старшыня саюзнага Саўміну (Лукашэнка — старшыня Дзяржсавету саюзнай дзяржавы).

Але гэтая працоўная група ня можа вырашыць палітычныя пытаньні. Чыноўнікі могуць, напрыклад, распрацаваць мэханізм пераходу на адзіную валюту, але пераходзіць ці не — гэта ня іх узровень, гэта канстытуцыйнае пытаньне. А на адпаведным узроўні, на ўзроўні прэзыдэнтаў, яно не было вырашанае і сёньня.

Аднак пры гэтым расейскі бок, Пуцін настойліва паўтараюць, што рэалізацыя саюзнай дамовы 1999-га году — на парадку дня, Расея ад прапановы пераходу на адзін рубель, стварэньня супольнай мытні, не адмаўляецца.

Ужо сёньня было заяўлена, што перамовы на ўрадавым узроўні, праца той самай працоўнай групы працягнецца і ў наступным годзе.

Навошта была патрэбная сёньняшняя сустрэча, праз 4 дні пасьля папярэдняй?

Для зьверкі гадзіньнікаў, як сказаў Пуцін. Хутчэй для высьвятленьня, што ніводзін з бакоў ня ў стане прымусіць іншага да саступак.

Ну а ўсё астатняе — словы ветлівасьці. Напярэдадні сустрэчы 25 сьнежня Лукашэнка ў Менску сказаў, што расейцаў ужо нібыта неяк і не выпадае называць братамі, гэта, паводле яго, вынікае з пазыцыі некаторых расейскіх кіраўнікоў. Сёньня Лукашэнка, зрабіўшы ўкол тады, «расшчодрыўся» і павіншаваў з Новым годам «расейцаў, нашых братоў». З маленечкай паўзай перад другім словам.

Так што зноў браты. Хіба шкада? А вось нечага больш сур’ёзнага і не рытарычнага — шкада».

Валер Карбалевіч: навошта было сустракацца?

Валер Карбалевіч
Валер Карбалевіч

«Варта зьвярнуць увагу, што Ўладзімер Пуцін у вітальным слове ў пачатку сустрэчы зазначыў галоўнае пытаньне парадку дня перамоваў: «Папрацуем у кірунку разьвіцьця нашых плянаў у будаўніцтве Саюзнай дзяржавы».

То бок пазыцыя расейскага боку даволі пасьлядоўная: грошы будуць толькі пры ўмове, што Беларусь пагодзіцца на далейшую інтэграцыю з Расеяй на аснове дамовы аб стварэньні Саюзнай дзяржавы ад 1999 году. Пра гэта казаў і кіраўнік ўраду Дзьмітрый Мядзьведзеў, і першы віцэ-прэм’ер РФ Антон Сілуанаў.

Рэплікі Аляксандра Лукашэнкі наконт тэмы перамоваў былі больш расплывістымі. Ён ня супраць гаварыць пра інтэграцыю.

Створаная працоўная група пачне працаваць толькі пасьля сьвятаў. Таму незразумела галоўнае: навошта было сустракацца? Каб прагаварыць адзін аднаму пазыцыі, якія былі сфармуляваны яшчэ падчас перамоваў 25 сьнежня?»

***

Чарговы ўсплёск напружаньня ў беларуска-расейскіх дачыненьнях узьнік пасьля таго, як Масква абвясьціла пра так званы падатковы манэўр, у выніку якога бюджэт Беларусі за наступныя 6 гадоў можа панесьці страты памерам да 10 мільярдаў даляраў.

Што важна ведаць пра расейскі падатковы манэўр

Нафтавы падатковы манэўр — зьмена спагнаньня экспартнага мыта на падатак на здабычу карысных выкапняў (ПЗКВ). Экспартнае мыта будзе зьмяншацца адначасова з павелічэньнем ПЗКВ.

  • Раней і да канца 2018 году ў Расеі экспарт сырой нафты абкладаўся экспартным мытам у памеры 30% ад цаны.
  • Мыта не спаганялася зь паставак у Беларусь на 18-20 мільёнаў тон у год.
  • Беларусь мела права абкладаць экспартным мытам свае нафтапрадукты, вырабленыя з расейскай бязмытнай нафты, якія прадавала ў трэція краіны. Беларускае мыта ішло ў беларускі бюджэт.

Страты і кампэнсацыя

  • У адміністрацыі Лукашэнкі сьцьвярджалі, што за 3 апошнія гады Беларусь недаатрымала 3 мільярды 600 мільёнаў даляраў, а за наступныя 4 гады недаатрымае 11 мільярдаў пры найгоршым разьвіцьці падзей.
  • Міністар фінансаў Беларусі Максім Ермаловіч казаў, што агульныя страты ад падатковага манэўру ацэньваюцца ў 8–12 млрд даляраў.
  • Віцэ-прэмʼер Беларусі Ігар Ляшэнка заявіў, што Беларусь разьлічвала на кампэнсацыю каля 310–315 мільёнаў даляраў.
  • У якасьці аплаты экспартнага мыта за нафту Расея абяцала пералічыць у бюджэт Беларусі каля 405 млн даляраў. Пазьней у кампэнсацыі адмовілі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG