Лінкі ўнівэрсальнага доступу

Віцэ-прэм’ер распавёў, на якую кампэнсацыю ад Расеі разьлічвала Беларусь


Ілюстрацыйнае фота

Віцэ-прэмʼер Беларусі Ігар Ляшэнка 14 сьнежня распавёў, што ў жніўні-лістападзе паміж Беларусьсю і Расеяй праходзілі перамовы наконт «разьлікаў» за падатковы манэўр. Пазьней расейскі бок заняў «крайнюю пазыцыю» і адмовіўся ад абмеркаваньня, піша Interfax.by.

Ляшэнка заявіў, што Беларусь разьлічвала на кампэнсацыю «роўна на элемэнт падатковага манэўру». Пры цане 60 даляраў за барэль гэта каля 310–315 мільёнаў даляраў.

Ляшэнка заявіў, што пасьля размовы зь Дзьмітрыем Мядзьведзевым 13 сьнежня стала «абсалютна зразумела» пазыцыя расейскага ўраду.

«На жаль, яна не супадае з разуменьнем нашага пытаньня. Нашае разуменьне справядлівае. Можна ўзяць эўразійскую дамову і прачытаць усе яе пункты, што ўмовы не павінны пагаршацца, пра тое, што павінны стварацца ўмовы для роўнага разьвіцьця», — сказаў Ляшэнка.

Намесьнік Мядзьведзева Дзьмітры Козак 11 сьнежня не захацеў абмяркоўваць нафтагазавыя пытаньні зь беларускай дэлегацыяй, якая ўжо прыбыла ў Маскву. Паводле неафіцыйнай інфармацыі, Козак не палічыў магчымым абмяркоўваць эканамічныя пытаньні да «прыняцьця прынцыповых рашэньняў аб руху ў кірунку далейшай інтэграцыі Расеі і Беларусі ў рамках саюзнай дзяржавы». Прэмʼер-міністар Расеі Дзьмітры Мядзьведзеў 14 сьнежня акрэсьліў патрабаваньні да інтэграцыі: агульныя валюта, суд, мытня і падліковая палата.

Што важна ведаць пра расейскі падатковы манэўр

Нафтавы падатковы манэўр у Расеі — паступовая замена спагнаньня экспартнага мыта падаткам на здабычу карысных выкапняў (ПЗКВ). Экспартнае мыта будзе зьмяншацца адначасова з павелічэньнем ПЗКВ.

  • Расея пачала рэалізацыю падатковага манэўра зь 2019 году.
  • Да канца 2018 году экспарт сырой нафты ў Расеі абкладаўся экспартным мытам у памеры 30% ад цаны. Мыта не спаганялася з паставак на ўнутрырасейскі рынак і ў межах квоты ў Беларусь.
  • У 2017-2018 гадах квота на пастаўкі бязмытнай расейскай нафты для Беларусі складала 24 млн тон (18 млн тон перапрацоўвалі беларускаія НПЗ, 6 млн тон ішлі на рээкспарт).
  • Беларусь мела права абкладаць экспартным мытам свае нафтапрадукты, вырабленыя з расейскай бязмытнай нафты, якія прадавала ў трэція краіны. Беларускае мыта ішло ў беларускі бюджэт.

Страты і кампэнсацыя

  • У сьнежні 2018 г. у адміністрацыі Лукашэнкі сьцьвярджалі, што за 3 апошнія гады Беларусь недаатрымала $3,6 млрд, а за наступныя 4 гады недаатрымае $11 млрд пры найгоршым разьвіцьці падзей.
  • Паводле падлікаў рэйтынгавага агенцтва Fitch, наўпроставыя страты беларускай эканомікі складуць $10,6 млрд цягам 2019–2024 гг.
  • Дырэктар дасьледніцкага цэнтру ІПМ Аляксандар Чубрык падлічыў, што страты для бюджэту Беларусі ў 2019 годзе склалі $272,3 млн. ​
  • У кастрычніку 2018 Расея абяцала пералічыць у бюджэт Беларусі каля $405 млн у якасьці аплаты экспартнага мыта за нафту. Пазьней у кампэнсацыі адмовілі.
  • 18 сьнежня 2019 расейскі партал РБК паведаміў са спасылкай на свае крыніцы, што Расея кампэнсуе Беларусі страты ад манэўра праз зваротны акцыз для беларускіх НПЗ. Суму субсыдыяў ацанілі ў $1,5 млрд. Афіцыйнага пацьвярджэньня гэтай інфармацыі не было.

Кароткая гісторыя нафтагазавых канфліктаў Беларусі і Расеі

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG