Лінкі ўнівэрсальнага доступу

Экпэрт пра цану на газ для Беларусі: «Гэта будзе вельмі жорсткі торг»


Уладзімер Пуцін, архіўнае фота

Паводле эканамічнага аглядальніка Тацяны Манёнак, пагаршэньне эканамічнай сытуацыі ў Беларусі вымушае Аляксандра Лукашэнку даволі жорстка таргавацца з Расеяй за перагляд цэнаў на газ.

Тацяна Манёнак
Тацяна Манёнак

«Цяпер ідзе падрыхтоўка да стварэньня ў 2025 годзе агульнага рынку газу на эўразійскай эканамічнай прасторы. У наступным годзе бакі павінны ўхваліць агульную канцэпцыю.

Беларусь зыходзіць з таго, што цэны на газ для беларускіх і расейскіх кампаній павінны быць аднолькавыя ці вельмі блізкія, каля 70 даляраў. Беларускі бок вельмі сьпяшаецца, каб хутчэй „заслупаваць“ гэтыя цэны.

Лукашэнка хоча больш прэфэрэнцый і больш таннага газу на бліжэйшую пэрспэктыву, зыходзячы з таго, што на гэтым рынку суб’екты гаспадараньня павінны мець роўныя ўмовы.

Гэта будзе вельмі жорсткі торг. Ня думаю, што Расея пагодзіцца на тое, чаго хоча Лукашэнка».

Паводле Тацяны Манёнак, гэты торг з Расеяй ідзе ў некалькіх кірунках. Расейскі ўрад стварыў прэфэрэнцыйныя, больш выгадныя ўмовы для расейскіх нафтаперапрацоўчых кампаній.

«Цяпер беларускі бок таргуецца за максымальную кампэнсацыю даволі істотных стратаў, якія панясе беларуская нафтаперапрацоўчая галіна і бюджэт. Ад гэтага торгу будзе залежаць, наколькі беларуская эканоміка будзе больш-менш стабільна адчуваць сябе ў бліжэйшыя гады».

Увесь час спрэчкі наконт паставак расейскіх энэрганосьбітаў вырашаліся на палітычным узроўні, і ўлічваліся ня толькі эканамічныя, але і палітычныя стасункі.

«Складана сказаць, ці выйграе цяпер Беларусь роўныя цэны на газ. Гэта будзе вельмі праблематычна. Бо гэта азначае дадатковыя істотныя субсыдыі для Беларусі. А што ўзамен? Калі будзе знойдзена раўназначная замена субсыдыям, то магчыма.

Раней казалі расейскія чыноўнікі: калі хочаце роўныя кошты, то ўваходзьце ў склад Расеі. Але наўрад ці Расея пагодзіцца на 70 даляраў, якія хоча Лукашэнка».

У 2011 годзе «Газпром» купіў беларускую газатранспартную сыстэму, і гэты калідор паставак газу празь Беларусь для яго самы танны.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG