Лінкі ўнівэрсальнага доступу

Дарожнікі патрабуюць зьнесьці 13 курапацкіх крыжоў


13 крыжоў, зьнесьці якія патрабуе «Менскаблдарбуд»

Абаронцу Курапат Валера Рабцава аштрафавалі за ўсталяваньне ля Курапатаў крыжоў, патрабуюць іх зьнесьці.

Супрацоўнікі прадпрыемства «Менскаблдарбуд» склалі пратакол на Валера Рабцава, якога палічылі вінаватым у парушэньні закону «Аб аўтамабільных дарогах і дарожнай дзейнасьці».

Паводле дарожнікаў, у верасьні Валер Рабцаў разам са Зьмітром Дашкевічам ды яшчэ 4 актывістамі парушыў гэты закон, бо не ўзгадніў усталяваньне 13 крыжоў уздоўж аўтадарогі «Заслаўе — Калодзішчы», на 15-м яе кілямэтры. Гэта той кавалак дарогі, які мяжуе з урочышчам Курапаты на поўначы.

Рабцаву са згоды генэральнага дырэктара «Менскаблдарбуду» Дзяніса Сьцяпанава выпісалі штраф памерам 2 базавыя велічыні.

Дарожнікі таксама патрабуюць ад актывіста да 31 кастрычніка дэмантаваць крыжы і прыбраць прыдарожную тэрыторыю. Таксама Валера Рабцава папярэдзілі, што ў выпадку адмовы крыжы будуць дэмантаваныя дарожнай службай, а гэта будзе каштаваць актывісту больш за 730 рублёў.

Апоўдні 31 кастрычніка карэспандэнт Свабоды абышоў па пэрымэтры Курапацкі лес. 13 крыжоў, пра якія ідзе гаворка ў пастанове, складзенай супрацоўнікамі «Менскаблдарбуду», стаяць па-ранейшаму. Ніякіх прац вакол іх карэспандэнт не заўважыў.

Прыбіраць крыжы ня будзем, — Дашкевіч

Абаронца Курапатаў Зьміцер Дашкевіч, які ўдзельнічаў у іх усталяваньні, кажа, што крыжы, пастаўленыя ўздоўж дарогі «Заслаўе — Калодзішчы» каля Курапатаў, — частка народнага мэмарыялу.

«Мы іх прыбіраць ня будзем. І вось зь якой прычыны. Гэтыя крыжы — частка народнага мэмарыялу, а не прыдарожныя аб’екты. А Курапаты — гістарычная каштоўнасьць і ахоўваюцца адмысловым законам. Дарожнікі хай паглядзяць уважлівей: на месцы, дзе ўсталяваныя гэтыя 13 крыжоў, і раней стаялі крыжы, якія ўжо спарахнелі, ад іх засталіся яміны і дзе-нідзе рэшткі ў лесе далей ад дарогі. То бок мы нічога не парушылі, а супрацоўнікі „Менскаблдарбуду“ перавышаюць свае паўнамоцтвы».

Спарахнелы крыж у Курапатах
Спарахнелы крыж у Курапатах

Паводле Зьмітра Дашкевіча, яго таксама выклікалі на разгляд падобнага пратаколу, але ён не пайшоў. «Валер пайшоў, вось яго і вырашылі пакараць».

Валер Рабцаў сказаў карэспандэнту Свабоды, што не зьбіраецца плаціць штраф і самаручна зносіць крыжы.

«Ня дзеля таго іх ставілі. А гэтую пастанову дарожнікаў буду абскарджваць. Ужо сёньня сустракаюся з праваабаронцамі, каб падаць скаргу», — сказаў абаронца Курапатаў.

Другі пратакол за крыжы

Паводле Валера Рабцава, раніцай 31 кастрычніка ён атрымаў па пошце яшчэ адзін пратакол за тыя самыя 13 крыжоў — гэтым разам з ідэалягічнага аддзелу Менскага райвыканкаму.

«Даслалі пратакол, у якім пішуць, што я нібыта парушыў пастанову ўраду, якой зацьверджаны парадак усталяваньня архітэктурных аб’ектаў. Паперу падпісаў чыноўнік С. Шаблыка. За гэта таксама можа быць штраф. Калі выпішуць, таксама буду аспрэчваць. А яшчэ зьвярнуся ў пракуратуру, каб праверылі, наколькі законныя дзеяньні чыноўнікаў».

Вакол урочышча Курапаты цягам ліпеня-верасьня Зьміцер Дашкевіч зь іншымі актывістамі ўсталявалі дадаткова 70 крыжоў вышынёй больш за 3 мэтры. Гэтыя крыжы добра відаць зь менскай кальцавой аўтадарогі і дарогі «Заслаўе — Калодзішчы». Грошы на ўсталяваньне гэтых крыжоў зьбіралі добраахвотна, было сабрана звыш 5 тысяч даляраў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG