Лінкі ўнівэрсальнага доступу

Два экс-міністры замежных справаў Грузіі выйшлі ў другі тур прэзыдэнцкіх выбараў


Ілюстрацыйнае фота

Па траціне галасоў атрымалі народжаная ў Парыжы Салімэ Зурабішвілі, якую падтрымлівае кіроўная праэўрапейская партыя, і апазыцыянэр Грыгол Вашадзэ, які адмовіўся ад расейскага пашпарта.

Цэнтральная выбарчая камісія Грузіі апублікавала папярэднія вынікі першага туру прэзыдэнцкіх выбараў, што прайшлі 28 кастрычніка. Грузія выбірае ўжо пятага прэзыдэнта.

Пасьля падліку 99,57% галасоў экс-міністарка замежных справаў Салімэ Зурабішвілі мае 38,66% галасоў, экс-міністар замежных справаў Грыгол Вашадзэ — 37,7%. Гэта значыць, яны выходзяць у другі тур. Дата другога туру пакуль не названая афіцыйна.

Яшчэ адзін экс-міністар замежных справаў Давід Бакрадзэ мае 10,97% галасоў. Яшчэ тры кандыдаты атрымалі 2–3% галасоў, астатнія 19 кандыдатаў — яшчэ меней.

Зурабішвілі, Вашадзэ і Бакрадзэ былі міністрамі пры прэзыдэнце Міхэілу Саакашвілі: першая ў 2004–2005 гадах, другі ў 2008–12, трэці — менш за чатыры месяцы ў 2008-м, але затым чатыры гады на пасадзе старшыні парлямэнту.

Салімэ Зурабішвілі (у цэнтры) з паплечнікамі
Салімэ Зурабішвілі (у цэнтры) з паплечнікамі

Народжаную ў Парыжы 66-гадовую Салімэ Зурабішвілі падтрымлівае кіроўная партыя «Грузінская мара», хоць фармальна яна ідзе на выбары як незалежная кандыдатка. Цяпер партыя мае 97 са 150 месцаў у парлямэнце, дэкляруе праэўрапейскія лёзунгі і выступае за «прагматычныя» стасункі з Расеяй.

Грыгол Вашадзэ (у цэнтры) з паплечнікамі
Грыгол Вашадзэ (у цэнтры) з паплечнікамі

60-гадовы кандыдат ад апазыцыянэраў «Сіла ў адзінстве» Грыгол Вашадзэ меў двайнее расейска-грузінскае грамадзянства, што зь цікавасьцю ўспрынялі і ў Грузіі, і ў Расеі, калі яго прызначылі міністрам замежных справаў праз чатыры месяцы па завяршэньні баявых дзеяньняў у расейска-грузінскай вайне. Праз год па прызначэньні ў Расеі ўжо прапаноўвалі адабраць у Вашадзэ расейскі пашпарт за «антырасейскую» пазыцыю. Палітык пагадзіўся і пазбавіўся расейскага грамадзянства.

Цяперашнія прэзыдэнцкія выбары ў Грузіі называюць «апошнімі»: надалей, з 2024 году, права выбіраць кіраўніка грузінскай дзяржавы даецца адмысловай «асамблеі», якая складаецца з дэпутатаў парлямэнту і мясцовых прадстаўнічых органаў.

Палітычныя сілы надавалі «апошнім усенародным выбарам прэзыдэнта» асаблівае значэньне, а перадвыбарчая кампанія праходзіла на фоне жорсткай палітычнай барацьбы. У тым ліку скандалаў з публікацыяй схаваных аўдыёзапісаў, на падставе якіх апазыцыя абвінавачвала ўлады ў карупцыі, а ўлады апазыцыю — у падрыхтоўцы «маштабнай дэстабілізацыі» пад падставай фальсыфікацыі выбараў.

Калі пераможа Зурабішвілі, яна стане першай жанчынай-прэзыдэнткай у Грузіі. Праўда, экс-прэзыдэнт Саакашвілі заяўляў, што калі ўлады «паспрабуюць сфальсыфікаваць вынікі» на ейную карысьць, «у краіне падымецца цунамі пратэсту», як і ў 2003 годзе, калі адбылася так званая «Рэвалюцыя ружаў».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG