Лінкі ўнівэрсальнага доступу

«Беларусь бяз гвалту». 6 прапаноў ад людзей, як змагацца за закон, адхілены Лукашэнкам


Сустрэча ўдзельнікаў суполкі "Маршыруй, дзетка" у Менску

У галерэі «Ў» у Менску ўдзельнікі суполкі ў «Фэйсбуку» «Маршыруй, дзетка!» абмеркавалі, як яны будуць змагацца за закон аб процідзеяньні хатняму гвалту.

5 кастрычніка Аляксандар Лукашэнка заявіў, што можна абысьціся зьменамі ў дзейныя законы, а не прымаць асобны супраць хатняга гвалту.

«Усё гэта дурасьць, узятая перш за ўсё з Захаду», — сказаў ён.

Сустрэча суполкі «Маршыруй, дзетка!»
Сустрэча суполкі «Маршыруй, дзетка!»

Падчас сустрэчы ў галерэі «Ў» прагучаў шэраг прапаноў, сярод іх асноўныя:

— дамагацца парлямэнцкіх слуханьняў у Палаце прадстаўнікоў;

— правесьці санкцыянаваны марш;

— стварыць агульны рух «Беларусь бяз гвалту»;

— стварыць пэтыцыі, арганізаваць збор подпісаў;

— закідаць адміністрацыі лістамі і зваротамі, паказаць, што не зьмірыліся з рашэньнем прэзыдэнта;

— правесьці грамадзкі трыбунал з удзелам ахвяраў гвалту.

Нядаўна створаная суполка ў «Фэйсбуку» «Маршыруй, дзетка!» ўжо аб’яднала больш за 1700 чалавек.

«Гэта сьведчыць пра тое, што тэма актуальная», — сказала на пачатку сустрэчы адна зь яе арганізатарак, актывістка Сьвятлана Гатальская.

«Нам трэба выходзіць у публічную прастору»

Ці ўдалося дасягнуць пастаўленых мэтаў? У інтэрвію карэспандэнту Свабоды Сьвятлана Гатальская сказала, што ўбачыла багата неабыякавых людзей.

«Было вельмі многа прапаноў пра тое, што рабіць далей. Такія сустрэчы мы будзем праводзіць рэгулярна. Я лічу, вельмі важна, каб былі ўнесены зьмены ў заканадаўства, на гэта накіруем усе намаганьні. У тым ліку будзем прасіць дазвол на правядзеньне маршу, нам трэба выходзіць у публічную прастору, каб паказаць усю глыбіню гэтай праблематыкі ў Беларусі. Нам трэба аб’ядноўваць нашы намаганьні», — сказала Гатальская.

Па ўсіх прапановах, якія прагучалі падчас сустрэчы, вырашана стварыць працоўныя групы. Тут жа ў залі прайшоў запіс валянтэраў.

«Чорная пятніца —​ гэта пункт невяртаньня»

Кіраўніца прытулку для ахвяраў хатняга гвалту «Радзіслава» Вольга Гарбунова сказала карэспандэнту Свабоды, што людзі пачынаюць аб'ядноўвацца і адкрыта заяўляюць аб праблеме хатняга гвалту.

«У мяне ёсьць невялікі скепсіс. Я ўпэўнена, што чорная пятніца —гэта такі пункт невяртаньня, і прыняцьце спэцыялізаванага закону аб процідзеяньні хатняму гвалту адсунутае на доўгія гады. Але гэта не азначае, што мы павінны цяпер скласьці рукі. Радасна бачыць, што яшчэ больш людзей гатовыя нешта рабіць у гэтай сфэры і кажуць пра гэта адкрыта. Ад нас, ад грамадзянаў, вельмі многае залежыць», — мяркуе Вольга Гарбунова.

«Нам ужо ня трэба даказваць актуальнасьць праблемы хатняга гвалту»

Кіраўніца аб’яднаньня «Гендэрныя пэрспэктывы» і сябра Нацыянальнай рады гендэрнай палітыкі Ірына Альхоўка, якая ў складзе рабочай групы пры МУС працавала над канцэпцыяй закону аб процідзеяньні хатняму гвалту, сказала, што праблема выйшла за межы арганізацый, якія прафэсійна ёй займаюцца.

Ірына Альхоўка падчас сустрэчы
Ірына Альхоўка падчас сустрэчы

«Гэта стала бліжэй звычайным людзям, якім не ўсё роўна. Гэта адзін з сайд-эфэктаў таго, што адбылося ў пятніцу, калі кіраўнік краіны асудзіў канцэпцыю. Нам ужо ня трэба даказваць актуальнасьць праблемы хатняга гвалту. Нам трэба казаць пра эфэктыўныя спосабы вырашэньня», — сказала Ірына Альхоўка.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG