Лінкі ўнівэрсальнага доступу

«Яны кажуць: а пайшоў ты...» Дырэктара школы вінавацяць у жорсткім зьбіваньні дзяцей


Скейтбардыст практыкуецца ў скачках, ілюстрацыйнае фота
Скейтбардыст практыкуецца ў скачках, ілюстрацыйнае фота

У Пінску расьсьледуецца інцыдэнт, які здарыўся 11 верасьня паміж дырэктарам сярэдняй школы № 18 Фёдарам Радзівонам і вучнямі СШ № 10 Дзянісам Ж. і Міхаілам Ц.

Свабода выслухала абодва бакі канфлікту, які стаў гучным дзякуючы сацыяльным сеткам.

Усё пачалося з таго, што двое хлопчыкаў пасьля ўрокаў вырашылі зьняць відэа для YouTube, як яны катаюцца на скейце. Якраз на пляцоўцы каля ўваходу ў 18-ю школу можна было разагнацца і скочыць зь невялікай прыступкі.

Дырэктар школы Фёдар Радзівон раней дазваляў там катацца. Але гэтым разам паміж дзецьмі і дырэктарам выйшаў канфлікт. Бацькі сьцьвярджаюць, што дырэктар зьбіў дзяцей. Дырэктар кажа, што дзеці самі выпадкова сутыкнуліся.

Улады: «Ідзе расьсьледаваньне»

Начальнік Пінскага ўпраўленьня адукацыі Яўген Мэндэль адмовіўся камэнтаваць сытуацыю.

«Яшчэ ніякага рашэньня не прынята, бо ідзе расьсьледаваньне», — сказаў ён.

Міліцэйскі пастарунак у Пінску
Міліцэйскі пастарунак у Пінску

​У Пінскім аддзеле міліцыі паведамілі, што справай займаецца інспэкцыя па справах непаўналетніх, пакуль ідзе праверка згодна з Крымінальна-працэсуальным кодэксам.

Дырэктар у лякарні: «Даводзіцца даказваць, што ты не вярблюд»

Свабода адшукала дырэктара школы Фёдара Радзівона ў лякарні, куды ён трапіў гэтай ноччу пасьля прыступу. Аднак ён пагадзіўся пагутарыць. Кажа, што ня біў ні гэтых хлопчыкаў, ні маці аднаго зь іх.

«Магчыма, я сябе недзе няправільна павёў, бо мяне пасылалі на тры літары, і я схапіў гэтых дзяцей. Ніхто законы фізыкі не адмяняў, і атрымалася так, што яны сутыкнуліся. Гэта адзінае, што я ім зрабіў. Ёсьць Бог, ёсьць кампэтэнтныя органы, і я спадзяюся, што яны разьбяруцца. А тое, што цяпер прымаецца нейкае палітычнае рашэньне звольніць незразумела за што, гэта таксама несур’ёзна і непрыгожа», — кажа дырэктар.

Што значыць «палітычнае рашэньне»?

«Улада вырашыла, што дырэктар школы не павінен сябе так паводзіць і парушае пэдагагічную этыку. Створаная камісія, каб вырашыць, ці зможа такі чалавек працаваць. Цяпер патрэбная фармальная нагода. Прыедуць, нешта знойдуць».

Яшчэ са жніўня дзеці ўпадабалі пляцоўку і ганак школы, каб катацца на скейтбордах і самакатах.

«Мы адрамантавалі ганак, абшылі мэталічным вугалком і яны з задавальненьнем там скакалі. У жніўні я папярэджваў, каб яны былі асьцярожныя. І быў такі выпадак, калі дзіця трапіла пад кола гэтага самаката. Таму мы казалі, каб дзеці не каталіся на ганку. Тым больш калі пачаўся навучальны год. Але яны зноў прыйшлі і не рэагавалі на заўвагі. Я кажу — дзеці, прайдзіце да мяне ў кабінэт для гутаркі. А яны кажуць: а пайшоў ты... Ну, я ж дзядзька ўжо, у мяне ўнукі. Ну, я іх схапіў, каб адвесьці ў кабінэт. Яны сутыкнуліся».

Далей Фёдар Радзівон выклікаў дырэктара школы, у якой вучацца дзеці, папрасіў, каб хлопчык патэлефанаваў сваёй маці.

«Замест таго каб паклікаць маму, ён крычаў, што яго зьбіваюць нагамі, парушаюць яго канстытуцыйныя правы. Калі прайшлі ў прыёмную, прыбегла мама і сказала, што згноіць мяне ў турме, што яе прозьвішча Ц., раней гэта быў начальнік абласнога ўпраўленьня. І мат-перамат. А потым уключыла камэру, кінулася на мяне і сказала, што будзе здымаць. Я адскочыў назад. І атрымаўся гэты хвілінны ролік, не зусім прэзэнтабэльны, эмацыйны. А сацсеткі вырашылі, што зьбілі маму, зьбілі ўсіх. І цяпер даводзіцца даказваць, што ты не вярблюд».

Ілюстрацыйнае фота. Пінск
Ілюстрацыйнае фота. Пінск

«Я прабачаюся, я не хацеў гэта зрабіць»

Дырэктар спадзяецца, што відэа вонкавага назіраньня, якое мае міліцыя, дапаможа яму давесьці сваю праўду. Ён кажа, што пяціклясьнік Міхаіл Ц. раней не вучыўся ў СШ № 18, а Дзяніс Ж. раней вучыўся.

«І будучы ў другой клясе ў нас, ён пашкодзіў зуб, на які там спасылаюцца. Мы гэтую сытуацыю ведаем і памятаем гэты канфлікт. Маці, відаць, хацела ўчора зь мяне грошай папрасіць: прыйшла і сказала, што я пашкодзіў яму зуб. Там адляцеў асколачак і так далей. І ніякіх больш прэтэнзій няма, як гэты пабіты палец і пашкоджаная губа. Але я прабачаюся, я не хацеў гэта зрабіць. Гэта адбылося празь неасьцярожнасьць. Я нават ня ведаю, якім чынам можна было пашкодзіць гэты палец, бо за рукі я іх не чапаў. А нейкае зьбіцьцё — гэта домыслы».

Фёдар Радзівон працуе дырэктарам ужо 12-ы год. Быў ляўрэатам спэцыяльнага фонду прэзыдэнта, дэпутатам, займаецца грамадзкай працай як сябра «Белай Русі». Разважае, што пэдагогі ператвараюцца ў абслуговы пэрсанал і нічога ня могуць сказаць дзіцяці. Хоць гэта сытуацыя шараговая, і звычайна яна вырашаецца падчас перамоваў з бацькамі.

«Дзеці ведаюць дырэктара. Яны ня кураць, ня п’юць. Яны, магчыма, ня так добра вучацца, але яны мяне паважаюць, бо я справядлівы».

Маці школьніка: «Міша практычна паўляжаў на крэсьле»

Маці пяціклясьніка Мішы Кацярына Ц. кажа, што ёй патэлефанаваў сын і, плачучы, сказаў, што яго б’юць у 18-й школе.

«Мой 18-гадовы сын хуценька пабег у школу, за ім я. Каля школы я ўбачыла Дзяніса Ж. з разьбітым тварам, ён выціраў кроў. Ён сказаў, што іх зьбіў дырэктар, а Мішу пацягнулі ў школу. У школе я пачула лаянку і крыкі. У прыёмнай убачыла, як дырэктар дзяўбе майго сына. Міша практычна паўляжаў на крэсьле, я думала, што ён памірае. У яго было малінавае вуха. Ён інвалід дзяцінства, сур’ёзна хворы, мы лекуемся ў Бараўлянах. На яго нельга рабіць фізычнае ўзьдзеяньне. Я стала паміж дырэктарам і сынам, паказала яму пасьведчаньне, што дзіця інвалід. Але дырэктар не адрэагаваў, і скандал працягваўся, ён пачаў мяне штурхаць».

Кацярына Ц. выклікала хуткую, але, як яна кажа, дырэктар перашкаджаў выйсьці з кабінэта. Яна пачала здымаць усё на тэлефон. Старэйшы сын адцягнуў на сябе ўвагу дырэктара, і Кацярыне зь Мішам удалося вырвацца.

«Дырэктар ударыў старэйшага сына, схапіў яго за шыю, дзе засталіся кровападцёкі. Мы ўсе зьнялі пабоі. Мы доўгі час правялі ў лякарні, сына ванітавала. Але лекары чамусьці не паставілі страсеньне мозгу. Мы доўга не маглі дамагчыся дакумэнтаў пра наш агляд».

На выхадзе зь лякарні стаяла міліцыя, якая прапанавала Кацярыне і Міхаілу паехаць для разбору ў 18-ю школу. Кацярына кажа, што сын дырэктара здымае яе і сына на відэа і выкладвае ў сацсеткі.

«Яны кантралююць кожны наш крок. Мы да лекара, яны там».

Кацярына напісала зварот у Берасьцейскі аблвыканкам, бо лічыць, што Фёдар Радзівон не павінен працаваць зь дзецьмі.

«Нашых дзяцей зьбілі»

Маці дзевяціклясьніка Дзяніса Анастасія Ж. кажа, што ў той дзень прыйшла дахаты з крамы і патэлефанавала сыну. А той ужо быў у лякарні.

«Дзяніс сказаў, што дырэктар 18-й школы яго зьбіў, у яго баліць губа і хістаюцца зубы. Калі я прыехала ў лякарню, там ужо была міліцыя. У сына распухла губа, пад губой рана. Потым у зубной паліклініцы далі заключэньне, што зубы хістаюцца. У даведцы лекараў гаворыцца пра гвалтоўнае і жорсткае стаўленьне.

Я не ўяўляю, як можа дзіця на самакаце стукнуцца аб майго сына, які ў два з паловай разы вышэйшы. Нашых дзяцей зьбілі. Мы баімся, што гэтую справу проста закрыюць, бо ён крычаў, маўляў, у яго столькі знаёмых, што мы самі будзем сядзець. Я ня ведаю, куды зьвяртацца, бо такая несправядлівасьць!»

Анастасія Ж. таксама адхіліла закіды дырэктара, што яна, маўляў, «хацела папрасіць грошай». Яна сказала, што мае аўдыёзапіс размовы.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG