Дэфляцыі хапіла на месяц. Цэны ў Беларусі пайшлі ўгару

10 верасень 2018, 17:13 абноўлена 10 верасень 2018, 20:27

У жніўні Белстат зафіксаваў павелічэньне спажывецкіх цэнаў на 0,1%. Пры гэтым ад пачатку 2018 году інфляцыя ў Беларусі склала 2,9%.

Дэфляцыя — павышэньне пакупніцкай здольнасьці мясцовай валюты, што выяўляецца ў зьніжэньні індэксу цэнаў.

У жніўні цэны на спажывецкія тавары зьменшыліся на 0,2%, але ад пачатку году падняліся на 1,7%. Цэны на паслугі ў параўнаньні з чэрвенем павялічыліся на 0,2%, ад пачатку году — на 5,8%.

Міністэрства працы заявіла, што ня будзе індэксаваць заробкі і стыпэндыі за жнівень, бо інфляцыя не перавысіла «пяціадсоткавага парогу».

Як сёлета зьмяняліся цэны на тавары і паслугі:

студзень +0,8%;
люты +0,9%;
сакавік +0,8%;
красавік +0,3%;
травень –0,3%;
чэрвень +0,4%;
ліпень –0,2%.

Летась дэфляцыя трывала два месяцы — у ліпені і ў жніўні, цэны зьнізіліся на 0,11% і 0,39% адпаведна.

ГЛЯДЗІЦЕ ТАКСАМА:

Тры прычыны, чаму ў Беларусі рэкордна запаволілася інфляцыя

Сёлета праз запаволеньне інфляцыі:

Міністэрства працы не індэксавала заробкі за красавік і жнівень;
Нацбанк зьнізіў стаўку рэфінансаваньня да гістарычнага мінімуму.

Інфляцыя за 2017 год склала 4,6%. Паводле бюджэту на 2018 год гадавая інфляцыя заплянаваная на ўзроўні 7,4%. Нацбанк Беларусі сёлета прагназуе інфляцыю на ўзроўні 5,5–6%.