У менскай кватэры журналісткі інфармацыйнага агенцтва БелаПАН Тацяны Каравянковай супрацоўнікі Сьледчага камітэту з раніцы 8 жніўня правялі ператрус і канфіскавалі носьбіты інфармацыі: цвёрдыя дыскі кампутараў, карту памяці фотаапарата і USB-назапашвальнік.
Сьледчыя паведамілі маці журналісткі, што Тацяна Каравянкова правяла ноч у Цэнтры ізаляцыі правапарушальнікаў на вуліцы Акрэсьціна — яна затрыманая на трое сутак у межах справы, якую завёў Следчы камітэт паводле ч. 2 арт. 349 Крымінальнага кодэксу Беларусі.
Затрыманьні незалежных журналістаў. Што важна ведаць
- Сьледчы камітэт завёў крымінальную справу за несанкцыянаваны доступ да кампутарнай інфармацыі. Максымальнае пакараньне паводле ч. 2 арт. 349 — абмежаваньне ці пазбаўленьне волі на тэрмін да 2 гадоў.
- 7–8 жніўня прайшлі ператрусы ў офісах Tut.by, БелаПАН, Realt.by, газэты «Культура» і ТАА «Айціві». Таксама па справе праходзіць выдавецкі дом «Беларуская навука».
- Вядома, што цягам 7–9 жніўня затрымалі 17 журналістаў. Іх вызвалялі пасьля допыту ў СК.
- 9 жніўня СК заявіў, што галоўная рэдактарка Tut.by Марына Золатава прызнала віну.
- Падставай для завядзеньня крымінальнай справы паслужыла паведамленьне БелТА пра збоі ў кліентаў пры доступе да платнай падпіскі на паслугі.
- Платная падпіска БелТА каштуе 612 рублёў на месяц.
- Хто асудзіў затрыманьні журналістаў і ператрусы ў рэдакцыях. Сьпіс
- У чэрвені 2018 году супраць кіраўніка БелаПАН Алеся Ліпая завялі крымінальную справу за ўхіленьне ад сплаты падаходнага падатку.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў