Лінкі ўнівэрсальнага доступу

Дзяніс Івашын: «Сьляды з рэстарацыі „Поедем поедим“ вядуць у хакейную каманду Лукашэнкі?»


Рэстарацыя «Поедем поедим» каля Курапатаў
Рэстарацыя «Поедем поедим» каля Курапатаў

Рэстарацыю «Поедем поедим» і хакейную зборную прэзыдэнта Беларусі можна злучыць лягічным ланцужком. Такімі высновамі са свайго расьсьледаваньня падзяліўся горадзенскі журналіст-расьсьледавальнік і актывіст Дзяніс Івашын.

Меркаваная жонка Вадзіма Бекбулатава, капітана хакейнай каманды прэзыдэнта Беларусі, мае бізнэс-сувязі зь Вячаславам Азаранкам, які, верагодна, мае дачыненьне да рэстарацыі «Поедем поедим», кажа Дзяніс Івашын.

Дзяніс Івашын
Дзяніс Івашын

Сутыкнуўся зь вялікай колькасьцю «фірмаў-пракладак»

Лявон Сагальчык, Антон Меліхаў і Вячаслаў Азаранка валодалі сумеснай фірмай Polaris Investment LLC USA у штаце Ілінойс (ЗША). Азаранка прадстаўляў інтарэсы Сагальчыка і Меліхава ў Беларусі. Потым зьехаў у Амэрыку і пэўны час жыў у доме Сагальчыка.

Бізнэсовец Вячаслаў Азаранка, верагодна, зьвязаны з Bealcy Investments Ltd. Cyprus — кампаніяй, якая часткова валодае ТАА «Белнаватэксгруп», якой належыць «Поедем поедим», робіць выснову аўтар расьсьледаваньня.

Дзяніс Івашын
Дзяніс Івашын

Кацярына Бекбулатава — бізнэс-партнэрка Вячаслава Азаранкі. Яна заснавальніца фірмы «Білсі-рыэлт», у якой фігуруе і Азаранка. Да таго ж іх аб’ядноўвае кіпрская фірма Iliotropion Trade & Service Ltd, дзе Кацярына, паводле адзінага дзяржаўнага рэгістра Кіпру, — дырэктарка, а Вячаслаў Азаранка і ейны сын Мікіта Бекбулатаў — прадстаўнікі фірмы.

Па высновах Івашына, «Білсі-рыэлт» юрыдычна зьвязаная з кампаніяй Bealcy Investments Ltd. Cyprus.

Інтэрʼер рэстарацыі каля Курапатаў
Інтэрʼер рэстарацыі каля Курапатаў

Аўтар расьсьледаваньня адзначае, што сутыкнуўся зь вялікай колькасьцю «фірмаў-пракладак». На яго думку, такія фірмы ствараюцца дзеля таго, каб цяжка было даведацца пра сапраўдных уласьнікаў, каб разьмеркаваць адказнасьць паміж многімі і каб зьменшыць рызыкі для кожнага асобнага бізнэсу.

Вадзім Бекбулатаў і Аляксандар Лукашэнка

Вадзім Бекбулатаў — вядомы беларускі хакеіст, удзельнік Алімпійскіх гульняў у Нагана і Солт-Лэйк-Сіці. Па заканчэньні спартовай кар’еры ў 2005 годзе быў запрошаны ў прэзыдэнцкую хакейную зборную. Да таго ж ён гуляе ў камандзе «Рубеж» памежных войскаў Беларусі разам з сынамі Аляксандра Лукашэнкі Віктарам і Дзьмітрыем.

«То бок ён увесь час з 2005 году ў нефармальнай абстаноўцы сустракаецца зь першымі асобамі дзяржавы і, падобна, мае мажлівасьць абмеркаваць усе праблемы з тым жа „Бульбаш-холам“ („Поедем поедим“. — РС)», — мяркуе Дзяніс Івашын.

У 2014 годзе Лукашэнка ўзнагародзіў Вадзіма Бекбулатава ордэнам Пашаны.

Сувязь праз сыноў і адрасы

Сувязі паміж сем’ямі працягваюцца і ў маладзейшым пакаленьні. Сын Вадзіма і Кацярыны Мікіта Бекбулатаў меў сумесную фірму LLC Managers з сынам Вячаслава Азаранкі Дэньні. Яна была зарэгістраваная на Кіпры і праіснавала каля году.

Сувязь паміж Азаранкам і Бекбулатавым існавала нават геаграфічная. У 1990-я гады яны меркавана жылі ў адным доме на Ўсходняй вуліцы ў Менску — амаль у суседніх кватэрах.

Што важна ведаць аб пратэстах супраць новай рэстарацыі ў Курапатах

  • Рэстаран стаіць за 50 мэтраў ад месца, дзе ў 1930-я адбываліся масавыя расстрэлы. Карнікі НКВД расстралялі тут, па розных ацэнках, ад 30 тысяч да 250 тысяч чалавек.
  • 28 траўня карэспандэнт Свабоды трапіў на тэрыторыю комплексу, дзе пабачыў падрыхтоўку да хуткага адкрыцьця рэстарацыі.
  • Грамадзкія актывісты штодня ад 31 траўня пікетуюць забаўляльны комплекс, патрабуючы яго закрыцьця.
  • 1 чэрвеня рэстаран «Поедем поедим» пачаў рэклямавацца ў інтэрнэце.
  • Рэстаран «Поедем поедим» у Курапатах меркавана запрацаваў увечары 5 чэрвеня.
  • 27 чэрвеня наведніцы рэстарацыі на аўтамабілі зьбілі актывіста Леаніда Кулакова, у яго пералом рукі.
  • Старшыня Партыі БНФ Рыгор Кастусёў 13 ліпеня паведаміў пра нейкія дамоўленасьці з уладальнікам рэстарацыі, але якія гэта дамоўленасьці — пакуль не сказаў.
  • Будоўля забаўляльнага комплексу пад назвай «Бульбаш-хол» пачалася ў 2012 годзе ў ахоўнай зоне Курапатаў. У 2014-м ахоўную зону зьменшылі.
  • Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.

​Сталінскія рэпрэсіі і Курапаты

У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы. Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 гады ў Курапатах — лясным масіве пад Менскам.

7 адказаў на наіўныя пытаньні пра рэстаран ля Курапатаў і пратэсты супраць яго

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG