Лікёра-гарэлачны завод у Брысталі зазнаў рэзкую крытыку пасьля таго, як пачаў выпускаць 75-градусную гарэлку пад назвай «Навічок». Кампанія Bristol Dry Gin прынесла прабачэньні, сказаўшы, што выбрала няўдалы час для выпуску гарэлкі, паведамляе ВВС.
Гарэлка «Навічок» зьявілася на фоне гісторыі з атручваньнем аднайменным нэрвова-паралітычным рэчывам у красавіку 2018 году ў Вялікай Брытаніі былога расейскага выведніка Сяргея Скрыпаля і ягонай дачкі Юліі. А ў канцы чэрвеня гэтым жа рэчывам атруціліся мужчына і жанчына. Жанчына памерла, а мужчына апрытомнеў і даў паказаньні паліцыі. Брытанскія спэцслужбы абвінавацілі Маскву ва ўжываньні хімічнай зброі.
Bristol Dry Gin заявіла, што гарэлка «Навічок» выпускалася ў абмежаванай колькасьці і яе вытворчасьць будзе спыненая.
Кампанія кажа, што рэцэпт гэтай гарэлкі распрацоўваўся даволі доўга. Яе рэклямным слоганам была фраза «Тут не да жартаў». Назву «Навічок» гарэлка атрымала пасьля таго, як Сяргея і Юлію Скрыпалёў выпісалі са шпіталю.
У заяве кампаніі гаворыцца, што гарэлка павінна была «палепшыць настрой і зьнізіць узровень стрэсу, а не абражаць». Па словах прадстаўнікоў кампаніі, кліенты паставіліся да новай гарэлкі вельмі станоўча.
Аднак на старонцы Bristol Dry Gin у «Фэйсбуку» зьявілася мноства нэгатыўных камэнтароў.
«Прабачце, але я думаю, што вельмі бестактоўна даваць алькаголю такую назву. Гэта сур’ёзная сытуацыя», — піша Дэвід Гілрой.
Пітэр Хупэр напісаў: «Вельмі бестактоўна. Ні ў чым не вінаватая жанчына памерла, мужчына знаходзіцца ў крытычным стане ў шпіталі. Я думаю, вам варта перагледзець сваю рэклямную стратэгію».
Нядаўна ў Беларусі таксама разгарэўся скандал з прычыны зьяўленьня ў беларускай гандлёвай сетцы гатунку піва «Навічок» вытворчасьці расейскай кампаніі Alaska Brewery, што выклікала бурнае абмеркаваньне ў інтэрнэце. Многія спажыўцы выказаліся пра неэтычнасьць продажу напою з такой назвай і беспрынцыповасьць расейскага вытворцы.
