Міністар абароны Вялікабрытаніі Гэвін Уільямсан усклаў адказнасьць на Расею за сьмерць 44-гадовай брытанкі Дон Стэрджэс, якая тыдзень таму трапіла ў шпіталь з сымптомамі атручваньня, паведамляе Reuters. Улады заявілі, што жанчына была атручаная нэрвова-паралітычным агентам «Навічок».
«Рэальнасьць такая, што Расея зьдзейсьніла напад на брытанскай зямлі, які прывёў да гібелі грамадзяніна Брытаніі», — заявіў ён.
Стэрджэс, якая пацярпел ад нэрвова-паралітычнага рэчыва ў Эймсбэры (паблізу ад Солсбэры, дзе ў сакавіку сёлета былі атручаныя экс-палкоўнік ГРУ Расеі Сяргей Скрыпаль і яго дачка Юлія), 8 ліпеня ўвечары памерла ў шпіталі.
Разам са Стэрджэс у бальніцу трапіў 45-гадовы Чарлі Роўлі, які застаецца ў крытычным стане.
Дон Стэрджэс і Чарлі Роўлі былі шпіталізаваныя 30 чэрвеня. 4 ліпеня ўлады абвясьцілі, што пара атруцілася «Навічком». Паліцыя лічыць, што брытанцы маглі патрапіць пад узьдзеяньне нэрвова-паралітычнага атрутнага рэчыва праз «заражаны прадмет». Самая высокая канцэнтрацыя была знойдзеная на іх руках. Паліцыя мяркуе, што яны трымалі ў руках ёмістасьць, у якой перавозілі «Навічок».
Паліцыя лічыць, што пацярпелыя не зьвязаныя з атручваньнем экс-палкоўніка ГРУ Расеі Сяргея Скрыпаля і яго дачкі Юліі, а сталі выпадковымі ахвярамі.
Брытанскія ўлады абвінавацілі расейскія спэцслужбы і Крэмль у атручваньні Скрыпалёў. У адказ на ўжываньне Расеяй хімічнай зброі на тэрыторыі Вялікабрытаніі прэм’ер-міністар краіны Тэрэза Мэй абвясьціла аб высылцы 23 расейскіх дыпляматаў, а таксама аб узмацненьні жорсткасьці заканадаўства ў дачыненьні да шпіянажу.
Вялікабрытанія зьвярнулася ў Раду Бясьпекі ААН, паставіўшы пытаньне аб ужываньні Расеяй хімічнай зброі на тэрыторыі каралеўства, і ў Арганізацыю па забароне хімічнай зброі, членам якой зьяўляецца Расея. Вялікабрытанія сьцьвярджала, што Расея ня зьнішчыла свае запасы хімічнай зброі, што павінна была зрабіць яшчэ 20 гадоў таму.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў