Лінкі ўнівэрсальнага доступу

Памерла брытанка, якая атруцілася «Навічком» пад Солсбэры


На месцы здарэньня

44-гадовая брытанка Дон Стэрджэс, якая пацярпела ад нэрвова-паралітычнага рэчыва ў Эймсбэры (непадалёк ад Солсбэры, дзе ў сакавіку гэтага году былі атручаныя экс-палкоўнік ГРУ Расеі Сяргей Скрыпаль і ягоная дачка Юлія), 8 ліпеня ўвечары памерла ў бальніцы, паведамляе «Настоящее время».

«Сьледчыя расьсьледуюць справу аб забойстве пасьля таго, як жанчына, якая зазнала ўзьдзеяньне нэрвова-паралітычнага рэчыва „Навічок“ у Эймсбэры ў графстве Уілтшыр, памерла ў бальніцы гэты вечар», — гаворыцца ў паведамленьні брытанскай паліцыі.

Скотланд-Ярд паведамляе, што ў жанчыны засталося трое дзяцей.

Кіраўнік ураду Вялікай Брытаніі Тэрэза Мэй заявіла, што яна «засмучаная і шакаваная» тым, што адбылося.

45-гадовы Чарлі Роўлі, які быў шпіталізаваны разам са Стэрджэс, усё яшчэ застаецца ў бальніцы Солсбэры. Ягоны стан ацэньваюць як крытычны.

Дон Стэржэс і Чарлі Роўлі былі шпіталізаваныя 30 чэрвеня. 4 ліпеня ўлады абвясьцілі, што пара атруцілася «Навічком». Паліцыя лічыць, што брытанская пара магла трапіць пад узьдзеяньне нэрвова-паралітычнага атрутнага рэчыва праз «заражаны прадмет». Самая высокая канцэнтрацыя была знойдзеная на іх руках. Паліцыя мяркуе, што яны трымалі ў руках кантэйнэр або посуд, у якім перавозілі «Навічок».

Брытанская паліцыя: прадмет з атрутай «Навічок» знаходзіўся ў замкнёнай прасторы

Паліцыя лічыць, што пацярпелыя не зьвязаныя з атручваньнем экс-палкоўніка ГРУ Расеі Сяргея Скрыпаля і яго дачкі Юліі, а сталі выпадковымі ахвярамі.

Брытанскія ўлады абвінавацілі расейскія спэцслужбы і Крэмль у атручваньні Скрыпалёў. У адказ на прымяненьне Расеяй хімічнай зброі на тэрыторыі Вялікай Брытаніі прэм’ер-міністар краіны Тэрэза Мэй абвясьціла аб высылцы 23 расейскіх дыпляматаў, а таксама аб узмацненьні жорсткасьці заканадаўства ў дачыненьні да шпіянажу.

Вялікая Брытанія зьвярнулася ў Раду Бясьпекі ААН, паставіўшы пытаньне аб ужываньні Расеяй хімічнай зброі на тэрыторыі каралеўства, і ў Арганізацыю па забароне хімічнай зброі, чыім сябрам зьяўляецца Расея. У запыце АЗХЗ Вялікая Брытанія сьцьвярджала, што Расея ня зьнішчыла свае запасы хімічнай зброі, што павінна была зрабіць яшчэ 20 гадоў таму.

«Як магло здарыцца новае атручэньне «Навічком». Відэа

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG