Сьледчы камітэт паведаміў пра акалічнасьці падзеньня будаўнічай люлькі з рабочымі, якое здарылася на тэрыторыі салігорскага «Беларуськалія».
Што трэба ведаць?
- 26 кастрычніка 2016 году на тэрыторыі «Беларуськалія» ў Салігорску абарваўся трос у будаўнічай люльцы, якая падымалася на дах.
- Шэсьць чалавек упалі з вышыні. Ад траўмаў пацярпелі чацьвёра рабочых, адзін зь іх загінуў.
Падчас выкананьня дахавых працаў на вышыні каля 10 мэтраў цесьляры знаходзіліся ў люльцы не для перамяшчэньня людзей, а для перамяшчэньня грузаў, заявілі ў Сьледчым камітэце. Іх працоўнае месца не было забясьпечана страховачнымі канатамі і «неабходным камплектам абсталяваньня».
Кіраўніцтва дапусьціла рабочых да працы без інструктажу і абсталяваньня
Па факце здарэньня ў 2016 годзе была заведзеная справа паводле ч. 2 арт. 303 Крымінальнага кодэксу Беларусі «Парушэньне правілаў бясьпекі горных і будаўнічых працаў». Цяпер яе накіравалі ў пракуратуру.
Сьледчы камітэт назваў чатырох абвінавачаных:
- намесьнік дырэктара па вытворчасьці;
- кіраўнік участку будаўніча-мантажных працаў;
- два майстры будаўнічай арганізацыі.
Паводле Сьледчага камітэту, абвінавачаныя:
- не арганізавалі бясьпечнага правядзеньня будаўнічых працаў;
- дапусьцілі рабочых да выкананьня працаў безь неабходнага інструктажу і абсталяваньня.
Паводле другой часткі крымінальнага артыкула 303 абвінавачаным пагражае да пяці гадоў абмежаваньня волі ці ад двух да пяці гадоў турмы. Яны пад падпіскай аб нявыезьдзе.
