Партал pravo.by апублікаваў пастанову Савету міністраў Беларусі № 286 ад 13 красавіка, якая зьмяняе правілы расьсьледаваньня і ўліку няшчасных выпадкаў на працы і прафэсійных захворваньняў. Дакумэнт набыў моц з моманту публікацыі.
Як будуць вызначаць прафэсійныя захворваньні?
Паводле новай пастановы вызначаць прафэсійны характар хранічных захворваньняў могуць спэцыялісты мэдычна-экспэртнай камісіі (МЭК) рэспубліканскага цэнтру прафэсійнай паталёгіі. Заключэньне камісіі можна будзе абскардзіць толькі ў судзе.
Раней такія заключэньні маглі даваць ня толькі спэцыялісты МЭК, але і спэцыялісты лекарска-кансультацыйных камісій (ЛКК) абласных цэнтраў прафэсійнай паталёгіі, абласных і гарадзкіх скурана-вэнэралягічных дыспансэраў, а таксама іншыя арганізацыі аховы здароўя, дзе ёсьць лекар-прафпатоляг.
А таксама
- Калі супрацоўнік загінуў на вытворчасьці ці праз прафэсійнае захворваньне, яго муж ці жонка змогуць азнаёміцца і атрымаць копіі дакумэнтаў расьсьледаваньня акалічнасьцяў сьмерці.
- Няшчасныя выпадкі, якія здарыліся па дарозе да месца камандзіроўкі ці назад на тэрыторыі дзяржаў СНД, будуць расьсьледавацца паводле беларускага заканадаўства.
- Калі здарэньне адбылося не на тэрыторыі арганізацыі-наймальніка, а на тэрыторыі заказчыка гэтай арганізацыі, то абедзьве кампаніі мусяць забясьпечыць расьсьледаваньне няшчаснага выпадку. Раней такія абавязкі былі толькі ў арганізацыі-наймальніка.
- Тэрмін, на працягу якога можна абскардзіць заключэньне аб няшчасным выпадку без звароту ў суд, скарацілі з трох да аднаго году.
