Лінкі ўнівэрсальнага доступу

Прызначаная судова-мэдычная экспэртыза загінулых шахтароў «Беларуськалія»


Тэрыторыя 3-га рудакіраваньня ў Салігорску

Упраўленьне Сьледчага камітэту па Менскай вобласьці працягвае расьсьледаваць крымінальную справу аб парушэньні правілаў бясьпекі горных працаў, што пацягнула за сабой па неасьцярожнасьці сьмерць двух чалавек у шахце прадпрыемства «Беларуськалій». Справа заведзеная па ч.2 арт. 303 Крымінальнага кодэксу Рэспублікі Беларусь.

Пра гэта паведаміла афіцыйная прадстаўніца ведамства Тацяна Беланог.

Увечары 9 сакавіка на падземным горным участку 3-га рудаўпраўленьня адбылося абвальваньне пароды, у выніку чаго пад завал трапілі машыніст горных вымальных машынаў і горнарабочы вычышчальнага забою.

Шахта, дзе здарыўся абвал. Фота Сьледчага камітэту
Шахта, дзе здарыўся абвал. Фота Сьледчага камітэту

У ноч з 10 на 11 сакавіка ратавальнікі паднялі целы загінулых — 45-гадовага Максіма Іванова і 33-гадовага Дзьмітрыя Валько.

З мэтай агляду месца выкіду пароды, фіксацыі сьлядоў у шахце працавала сьледча-апэратыўная група. Вывучаецца вытворчая і тэхнічная дакумэнтацыя, якая рэглямэнтуе парадак правядзеньня горных работ і інструктажоў па тэхніцы бясьпекі. Працягваюцца допыты работнікаў і службовых асобаў прадпрыемства. З мэтай выяўленьня дакладнай прычыны гібелі рабочых прызначана судова-мэдычная экспэртыза.

Шахта, дзе здарыўся абвал. Фота Сьледчага камітэту
Шахта, дзе здарыўся абвал. Фота Сьледчага камітэту

Сёньня ў Салігорску родныя, сябры, калегі разьвітваюцца з Максімам Івановым і Дзьмітрыем Валько. Пахаваюць шахтароў 13 сакавіка.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG