«Газэта па-ўкраінску» сьцьвярджае, што алігархі рыхтуюць украінцам новага прэзыдэнта. Аўтар артыкулу раіць украінцам старанна цікавіцца — хто інвэставаў у «мэсію» і якія абавязаньні перад спонсарамі ён павінен будзе выканаць.
Праект лідэра гурту «Акіян Эльзы» Сьвятаслава Вакарчука фінансуюць Віктар Пінчук і расейскі «Альфа-Банк», сьцьвярджае аўтар Яўген Дзікі, экс-камандзір роты батальёну «Айдар».
Аўтар піша, што ўпершыню аб праекце «Вакарчук — прэзыдэнт» як нешта сур’ёзнае пачуў больш за год таму ад аднаго расейскага дыплямата. «Ён агучыў мне тэзіс пра Сьвятаслава як „прэзыдэнта прымірэньня“», — напісаў Дзікі.
Сьпявак Сьвятаслаў Вакарчук пакуль не камэнтаваў падобныя сьцьвярджэнні ў СМІ. Тым часам Віктар Пінчук у размове з «Грамадзкім» назваў усе чуткі аб падтрыманьні сьпевака «трызьненьнем» і выказаў сумнеў, што той наагул пойдзе на выбары.
