Лінкі ўнівэрсальнага доступу

Расейскі «Альфа-банк» спыняе крэдытаваць «абаронку» РФ праз санкцыі ЗША


Міхаіл Фрыдман, саўладальнік "Альфа-банку"

«Альфа-банк» спыняе абслугоўваньне расейскіх прадпрыемстваў ваенна-прамысловага комплексу праз пагрозу санкцыяў з боку ЗША.

Пра гэта паведаміў радыёстанцыі «Эхо Масквы» першы намесьнік старшыні рады дырэктараў банку Алег Сысуеў. «Гэта ня значыць, што мы ўвадначасьсе парвалі зь імі адносіны. Мы імкнёмся максымальна скараціць рызыкі», — адзначыў Сысуеў. Ён падкрэсьліў, што прадпрыемствы абароннага комплексу складалі значную частку крэдытнага партфэлю «Альфа-банку».

Саўладальнік «Альфа-банка» Міхаіл Фрыдман раней у інтэрвію часопісу «Форбс» на пытаньне аб тым, як адбіліся санкцыі на абслугоўваньні банкам расейскіх абаронных прадпрыемстваў, адказаў: «Вядома, мы адтуль сышлі». Ён падкрэсьліў, што ні ў банку, ні ў прадпрыемстваў ВПК у сувязі з гэтым не ўзьнікла праблемаў.

Злучаныя Штаты ў сувязі з анэксіяй Крыму, вайной на ўсходзе Ўкраіны і меркаваным умяшаньнем Расеі ў выбары прэзыдэнта ЗША ўвялі санкцыі супраць шэрагу расейскіх фізычных і юрыдычных асобаў, у тым ліку некаторых абаронных прадпрыемстваў і дзяржаўных структураў, такіх як Фэдэральная служба бясьпекі. Закон, прыняты ў мінулым годзе Кангрэсам, прадугледжвае, што амэрыканская адміністрацыя можа пашырыць санкцыйны сьпіс за кошт асобаў і арганізацыяў, якія супрацоўнічаюць з расейскімі сілавымі структурамі і вайскова-прамысловым комплексам.

Ваша меркаваньне

Паказаць камэнтары

XS
SM
MD
LG