Лінкі ўнівэрсальнага доступу

У Кіеве спрабавалі разагнаць акцыю пратэсту. У паліцыі кажуць, што шукалі Саакашвілі


Ілюстрацыйнае фота. Сутыкненьні паміж паліцыяй і прыхільнікамі Міхэіла Саакашвілі ў Кіеве 5 сьнежня 2017 году

Удзельнікі акцыі пратэсту, што трывае ў Кіеве каля Вярхоўнай Рады Ўкраіны, заяўляюць пра спробы штурму паліцыяй намётавага мястэчка.

«А шостай раніцы прачнуліся ад крыкаў „Пад’ём!“ Ветэраны-атошнікі — малайцы. За сэкунды занялі пазыцыі», — напісала ў Facebook адна з актывістак, перасяленка з Крыму Ліза Багуцкая.

Паводле яе, спачатку была спроба псыхалягічнага ціску на пратэстоўцаў, а праз 20 хвілін — «атака сілавікоў». У часе сутыкненьня некаторым актывістам разьбілі галовы. Удзельнікі пратэсту пачалі будаваць барыкады.

«Раніцай, выконваючы даручэньне Генэральнай пракуратуры, паліцыя і Служба бясьпекі Ўкраіны праводзілі захады вышуку ды затрыманьня Саакашвілі. Актывісты пачалі чыніць супраціў і правакаваць правааахоўнікаў», — паведамілі Свабодзе ва ўпраўленьні Нацыянальнай паліцыі Кіева.

Адначасова суразмоўца падкрэсьліў, што ніводзін удзельнік акцыі ня быў затрыманы падчас гэтых дзеяньняў спэцслужбаў.

***

5 лістапада сьледчыя Генпракуратуры ды Службы бясьпекі Ўкраіны прыйшлі па ператрус у кіеўскую кватэру, што арандуе Міхэіл Саакашвілі, грузінскі палітык, які за агрэсіўную крытыку атачэньня Пятра Парашэнкі пазбавіўся ня толькі пасады кіраўніка Адэскай абласной дзяржаўнай адміністрацыі (у 2016 годзе), а і ўкраінскага грамадзянства (у 2017-м).

Кар’ера Міхэіла Саакашвілі: ад прэзыдэнта ў Грузіі да лавы падсудных ва Ўкраіне?

Украінскія ўлады абвінавачваюць Саакашвілі ў спробе дзяржаўнага перавароту і атрыманьні паўмільёна даляраў на акцыі пратэсту ва Ўкраіне ад блізкага да Віктара Януковіча алігарха Сяргея Курчанкі, што ўцёк пасьля Эўрамайдану ў Расею. У дачыненьні да Міхэіла Саакашвілі распачатая крымінальная справа паводле часткі 1 артыкулу 256 Крымінальнага кодэкса Украіны — спрыяньне ўдзельнікам злачыннай арганізацыі і іх фінансаваньне.

Саакашвілі затрымалі, але праваахоўнікі не змаглі прывезьці палітыка на допыт — ягоныя прыхільнікі блякавалі аўтамабіль на працягу некалькі гадзін, а пазьней пашкодзілі яго і вызвалілі палітыка. Адразу пасьля гэтага Міхэіл Саакашвілі ўзначаліў калёну пратэстоўцаў, накіраваўшыся да будынку Вярхоўнай Рады Ўкраіны. Падчас выступу на мітынгу Міхэіл Саакашвілі абвергнуў абвінавачаньні, высунутыя на ягоны адрас.

Беспарадкі ў Кіеве 5 сьнежня: як арыштоўвалі і адбівалі Міхаіла Саакашвілі
пачакайце

No media source currently available

0:00 0:03:35 0:00

Генэральны пракурор Украіны Юры Луцэнка заявіў, што Саакашвілі цяпер знаходзіцца ў статусе «уцекача». Па словах Луцэнкі, сваімі дзеяньнямі палітык паставіў пад сумнеў магчымасьць абраньня для яго меры стрыманьня ў выглядзе хатняга арышту. Генпракурор таксама паведаміў, што супраць грамадзян, якія вызвалялі Саакашвілі з аўтамабіля, адкрытыя крымінальныя справы. Сьледзтва найбліжэйшым часам таксама вызначыцца зь дзеяньнямі ў дачыненьні да васьмі дэпутатаў парлямэнту, якія спрыялі ўцёкам палітыка з-пад варты.

У лістападзе Міхэіл Саакашвілі ўзначаліў акцыю пратэсту каля Вярхоўнай Рады Ўкраіны, дзе было ўсталяванае намётавае мястэчка з патрабаваньнямі да ўлады актывізаваць барацьбу з карупцыяй. Пазьней удзельнікі акцыі пашырылі свае патрабаваньні да імпічмэнту прэзыдэнта Ўкраіны Пятра Парашэнкі.

XS
SM
MD
LG