Лінкі ўнівэрсальнага доступу

Міністар абароны выказаў спачуваньні сваякам Коржыча, паабяцаў пакараць вінаватых


Андрэй Раўкоў

Міністар абароны Беларусі Андрэй Раўкоў пракамэнтаваў гібель салдата Аляксандра Коржыча празь 15 дзён па здарэньні, перадае БелТА.

Войска — гэта школа для маладых людзей, і ў вайсковым калектыве не павінна быць халатнасьці і баязлівасьці, падкрэсліў міністр.

«Камандзіры і начальнікі павінны адказваць за падначаленых, — заявіў ён. — Не павінна быць сьмерцяў вайскоўцаў, асабліва тэрміновай службы ў мірны час».

Раўкоў таксама заявіў, што пакараньне павінна быць непазьбежным і ў дачыненьні непасрэдна вінаватых, і ў дачыненьні тых службовых асобаў, якія дапусьцілі здарэньне сваім дзеяньнем, бязьдзеяньнем ці абыякавасьцю.

Ён дадаў, што бацькі мусяць зьвяртаць увагу на тое, што кажуць камандзіры вайсковых частак, у якіх служаць іхныя дзеці, трымаць сувязь з вайсковай часткай, а калі няма даверу да яе кіраўніцтва, прыходзіць на прыём да міністра ці зьвяртацца ў іншыя органы.

У Асобным навучальным цэнтры №72 у Печах працягваецца праверка па факце сьмерці салдата 21-гадовага Аляксандра Коржыча і прымаюцца захады ў «недапушчэньні здарэньняў», паведаміла сёньня Міністэрства абароны Беларусі.

Міністар заявіў, што ў дачыненьні часткі пачалі рэалізацыю «кадравых, тэхнічных і арганізацыйных» захадаў, пытаньні яе ў найбліжэйшы час будуць «кардынальна вызначаныя».

Мінабароны расказала падрабязнасьці «кадравых чыстак» у Печах

За «непрыняцьце захадаў у прадухіленьні гібелі вайскоўца» быў звольнены шэраг ваеннаслужачых, у тым ліку камандзір часткі, дзе служыў Аляксандар Коржыч. Сьледчыя распачалі крымінальныя справы ў дачыненьні 10 вайскоўцаў, у тым ліку двух афіцэраў.

Як паміраюць у беларускім войску. Толькі ў Барысаве сёлета зафіксавалі чатыры сьмерці

Аляксандар Коржыч
Аляксандар Коржыч

Паводле СК, цела Аляксандра Коржыча каля 17-й гадзіны 3 кастрычніка знайшлі «ў пятлі з мацерчатай папругі для штаноў, прымацаванай свабодным канцом да мэталічнай арматуры пад стольлю склепа, зь перавязанымі шнурком абутку нагамі і надзетай на галаву майкай».

Адразу па здарэньні прэсавы сакратар Мінабароны Ўладзімер Макараў назваў «чуткамі і домысламі» сумневы родных і сяброў загінулага Коржыча ў тым, што хлопец учыніў суіцыд. Цяпер сытуацыя вакол гібелі салдата на «жорсткім кантролі» ў Аляксандра Лукашэнкі, але вэрсіі суіцыду па-ранейшаму разглядаюцца.

Беларусы сабралі больш за 10 тысяч подпісаў за адстаўку міністра абароны Андрэя Раўкова, але Мінабароны ў адказ на звароты паскардзілася на спам і заблякавала сайт збору подпісаў, а таксама заяўляла пра наўмысную «інфармацыйную кампанію» супраць сябе і апраўдвалася зьмяншэньнем колькасьці злачынстваў і суіцыдаў у войску паводле афіцыйнай статыстыкі.

Што такое Печы і чаму адтуль шмат кепскіх навінаў?

***

Самыя галоўныя і цікавыя навіны можна атрымліваць адразу ж, падпісаўшыся на Тэлеграм-канал Радыё Свабода.

Ваша меркаваньне

Паказаць камэнтары

XS
SM
MD
LG