Лінкі ўнівэрсальнага доступу

Журналіст паскардзіўся, што яго зьбілі міліцыянты. Сьледчыя адмовіліся завесьці справу


Дзяніс Марук

Упраўленьне Сьледчага камітэту па Берасьцейскай вобласьці адмовілася завесьці справу на міліцыянтаў, якія зьбілі рэдактара сайту realbrest.by Дзяніса Марука ў Ленінскім РАУС. Сьледчыя, якія разглядалі скаргу тры месяцы, прыйшлі да высновы, што міліцыянты не парушылі заканадаўства.

Дзяніс Марук быў затрыманы 28 сакавіка. Паводле яго словаў, міліцыянты ў Ленінскім РАУС зьбілі яго. Білі галавой аб сьцяну, па нырках, выкручвалі рукі, кінулі на брудную падлогу, тыкалі пальцам у вочы, затыкалі рот і нос, каб задыхнуўся, устаўлялі ў зубы сталовую лыжку.

Пасьля гэтага журналіст зафіксаваў пабоі і накіраваў скаргу ў пракуратуру і Сьледчы камітэт:

«Сьледчыя мне сказалі, што ў запісах відэакамэры зь Ленінскага РАУС не відаць, каб было зьбіцьцё. Маўляў, пагадзіцеся, што мы ня бачым кулака, які трапляў бы ў вашу галаву. Але гэта абсалютна зразумела з запісу. Была добра відаць лыжка, якую паклалі на паліцу — пасьля таго як расьціскалі мне сківіцы. У выніку расьсьледаваньне прыйшло да высновы, што міліцыянты дзейнічалі ў межах закону, бо я раптам стаў уяўляць пагрозу сабе і навакольным. Таму, каб апанаваць сытуацыю, міліцыянты нібыта не маглі ня дзейнічаць гвалтоўным чынам».

Сьледчыя таксама адмовіліся завесьці крымінальную справу супраць самога журналіста паводле артыкулу «Загадзя ілжывы данос», кажа Дзяніс Марук:

«Атрымліваецца, што я схлусіў, але адначасова і не схлусіў. Яны мяне апраўдваюць, нібыта я сказаў праўду, але і адначасова прымаюць рашэньне, што мяне ніхто не зьбіваў і не катаваў. Цікава, што на працягу месяца сьледчыя таксама высьвятлялі, ці не нанёс я сам сабе пашкоджаньні, якія былі зафіксаваныя судова-мэдычнай экспэртызай».

Ваша меркаваньне

Паказаць камэнтары

XS
SM
MD
LG