Кіраўнікі аграрных ведамстваў Расеі і Беларусі — Аляксандар Ткачоў і Леанід Заяц — правядуць сёньня ў Маскве рабочую сустрэчу. Як паведамляе беларускае Міністэрства сельскай гаспадаркі і харчаваньня, перадусім будуць абмяркоўвацца пытаньні аднаўленьня паставак сельгаспрадукцыі на расейскі рынак.
Апошнім часам асаблівую вастрыню ва ўзаемным гандлі набыла праблема паставак малака і малочнай прадукцыі зь Беларусі. «Рассельгаснагляд» заявіў, што выявіў антыбіётыкі і кансэрванты ў асартымэнце шэрагу беларускіх прадпрыемстваў, некаторыя зь іх маюць пабочны эфэкт і ўяўляюць пагрозу для здароўя чалавека.
Напрыклад, афляксацын і фторхінолы супрацьпаказаныя дзецям да 18 гадоў, а ў старых людзей павялічваецца рызыка разрыву сухажыльляў. Хіналёны аказваюць узбуджальнае дзеяньне на цэнтральную нэрвовую сыстэму, іх не рэкамэндуюць пацыентам з сутаргавым сындромам, пры нырачнай і пячоначнай недастатковасьці. Многія прэпараты не рэкамэндуюцца цяжарным і кормячым жанчынам. Акрамя таго, выяўлены рэшткі прэпаратаў, прызначаных для лячэньня пранцаў.
У выніку «Рассельгаснагляд» забараніў пастаўкі прадукцыі з шэрагу малочных прадпрыемстваў Беларусі, да якіх былі прэтэнзіі.
Беларускі бок стаўленьне з боку расейскага ведамства называе «прадузятым» і разьлічвае, што сёньня блякада з айчынных вытворцаў будзе зьнятая.
«Няма сёньня аргумэнтаў і няма фактаў, якія маглі б перашкаджаць прасоўваньню нашай прадукцыі ў Расею. Мы бачым прадузятае стаўленьне з боку супрацоўнікаў асобных ведамстваў», — заявіў кіраўнік Мінсельгасхарчу Леанід Заяц у інтэрвію БелТА.
Паводле чыноўніка, новыя абмежаваньні выклікалі зьдзіўленьне і ў ведамстве, і ў прадпрыемстваў.
«Увесь год выраблялі малако, перапрацоўвалі, адпраўлялі ў Расею — не было ніводнага факту, каб у прадукцыі выявілі антыбіётыкі. Таму апошнія заявы калегаў, шчыра кажучы, зьдзіўляюць».
Паводле афіцыйных зьвестак, Беларусь штогод зарабляе ў сярэднім 3 мільярды даляраў на пастаўках малака і малочнай прадукцыі ў Расею — гэта ў тры разы больш, чым ад гандлю зброяй. Нават часовая страта рынку будзе мець для галіны адчувальныя наступствы.
Дэфіцыт малака ў Міністэрстве сельскай гаспадаркі Расеі ацэньваюць у 5-7 мільёнаў тон на год. Ён пакрываецца ў асноўным за кошт беларускай прадукцыі.
