На цырымоніі ўручэньня даверчых лістоў амбасадарам шэрагу краінаў у Беларусі Аляксандар Лукашэнка заявіў, што Беларусь атрымала новыя магчымасьці да эўрапейскай інтэграцыі, перадае БЕЛТА.
«У цяперашні час Беларусь старшынюе ў Цэнтральна-Эўрапейскай ініцыятыве. Дзякуючы гэтаму ў нас зьявіліся новыя магчымасьці для больш шырокага ўключэньня дзяржавы ў эўрапейскія інтэграцыйныя працэсы, — заявіў Лукашэнка. — Не выпадкова тытульнай тэмай беларускага старшынства абрана прасоўваньне сумяшчальнасьці ў Вялікай Эўропе. Пагадзіцеся, у кантэксьце цяперашняй нестабільнай абстаноўкі і беспрэцэдэнтных выклікаў яна мае асаблівае значэньне».
Таксама Лукашэнка адзначыў, што афіцыйны Менск «мае магчымасьць пачаць канструктыўны дыялёг з прадстаўнікамі многіх эўрапейскіх дзяржаваў» у час прыёму ў Менску сэсіі Парлямэнцкай асамблеі АБСЭ.
Акрамя таго, на думку Лукашэнкі, Беларусь «у стане забясьпечыць замежным партнэрам выхад на вялікі рынак Эўразійскага эканамічнага саюзу», што падвышае інвэстыцыйную прывабнасьць краіны, а «памкненьне да адкрытасьці» краіны пацьвярджае ўкараненьне 5-дзённага бязьвізавага рэжыму для грамадзянаў шэрагу краінаў.
Цэнтральна-Эўрапейская ініцыятыва – арганізацыя 18 краінаў цэнтральнай і паўднёвай Эўропы, створаная ў 1989 годзе Аўстрыяй, Вугоршчынай, Італіяй і Югаславіяй. Беларусь далучылася да яе ў 1996 годзе. Дырэктар Цэнтру эўрапейскай трансфармацыі Андрэй Ягораў называў ініцыятыву «артэфактам»: маўляў, раней яна выкарыстоўвалася, каб інтэграваць частку ўсходнеэўрапейскіх краінаў у Эўразьвяз, а пасьля пашырэньня Эўразьвязу засталася функцыянаваць «без асаблівых абавязальніцтваў, захаваўшы толькі камунікатыўны фармат».
