Лінкі ўнівэрсальнага доступу

Нявеста Лазоўскага: Міраслава прывялі ў крыві і ў кайданках


Міраслаў Лазоўскі (кадр зь перадачы тэлеканалу Белсат)
Міраслаў Лазоўскі (кадр зь перадачы тэлеканалу Белсат)

Карэспандэнт Свабоды пагутарыў зь нявестай затрыманага ўчора Міраслава Лазоўскага Сьвятланай.

Нявеста Міраслава Лазоўскага Сьвятлана плача, узгадваючы тое, як учора ўвечары людзі ў цывільным і двое ў чорнай вопратцы ды ў масках на тварах прывезьлі Міраслава дамоў і праводзілі ператрус.

«Быў зьбіты, твар у крыві. Завялі ў кайданках і пасадзілі на зэдлік тварам да сьцяны. Дазволілі толькі даць папіць, размаўляць не дазволілі».

Паводле Сьвятланы, на час ператрусу былі запрошаныя ў якасьці панятых дзьве суседкі. З забраных рэчаў Сьвятлана памятае кампутар, усе грошы («сямейныя назапашваньні»), ейны пляншэт. «Сказалі, што для праверкі».

Таксама былі забраныя «нейкія рэчы з сымболікай Украіны» і шэўрон арганізацыі «Белы легіён».

Паводле Сьвятланы, чалавек, які праводзіў ператрус, пацьвердзіў, што ён зьвязаны з заклікамі да ўзброенай барацьбы, якія зьявіліся ў інтэрнэце нібыта ад імя Міраслава Лазоўскага.

«Ягоны акаўнт у Фэйсбуку быў узламаны, зьявіўся гэты заклік, да якога ён ня мае дачыненьня. Яму званілі сябры і пыталіся, ці ты ведаеш пра гэта, што ад твайго імя распаўсюджваюць? Ён ведаў, а што зробіш?»

Сьвятлана ня ведае, дзе цяпер трымаюць яе любімага чалавека, і кажа, што вельмі за яго непакоіцца.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG