Лінкі ўнівэрсальнага доступу

Суд накіраваў справу праваабаронцы Андрэя Бандарэнку на дапрацоўку. Яму пагражае яшчэ 2 гады турмы. ФОТА


Андрэй Бандарэнка ў судзе

У Ленінскім судзе Магілёва пачаўся разгляд крымінальнай справы супраць праваабронцы Андрэя Бандарэнкі. Яго вінавацяць у злосным непадпарадкаваньні патрабаваньням адміністрацыі папраўчай установы «Турма № 4». Калі яго прызнаюць вінаватым, то яму пагражае да двух гадоў зьняволеньня.

Андрэя Бандарэнку пад канвоем вядуць у суд
Андрэя Бандарэнку пад канвоем вядуць у суд

Пачалося папярэдняе слуханьне справы. Вядзе працэс Ірына Ланчава. Паводле яе, парушана працэдура прызначэньня адказных за вядзеньне сьледзтва, таму матэрыялы справы варта вярнуць пракуратуры. Дзяржаўны абвінаваўца выступіла супраць. Адвакат і сам Бандарэнка, які прысутнічае на пасяджэньні за кратамі на лаве падсудных, падтрымалі пазыцыю судзьдзі. Судзьдзя абвясьціла перапынак, каб вынесьці рашэньне.

Цяпер Бандарэнка ўтрымліваецца ў зьняволеньні ва ўмовах турэмнага рэжыму. 31 сакавіка сканчаецца тэрмін пакараньня паводле выраку Кастрычніцкага раённага суду Менску, які пакараў Бандарэнку 4 гадамі калёніі ўзмоцненага рэжыму. Пазьней у выніку амністыі пакараньне было скарочанае на год.

Андрэй Бандарэнка
Андрэй Бандарэнка

У Магілёўскай турме № 4 Бандарэнка лічыцца злосным парушальнікам рэжыму і знаходзіцца на прафіляктычным уліку як здольны да гвалту ў дачыненьні да супрацоўнікаў турмы і захопу закладнікаў. На заяву Бандарэнкі зь меркаваньняў уласнай бясьпекі ён утрымліваецца ў адзіночнай камэры. З выгляду моцна схуднелы.

На пачатку суду журналістам дазволілі сфатаграфаваць асуджанага. Судзьдзя на пасяджэньні не задаволіла хадайніцтва Бандарэнкі, каб на пасяджэньні вялася фота- і відэаздымка.

Судзьдзя пасьля перапынку накіравала справу на дапрацоўку. Калі будзе наступнае паседжаньне, невядома.

Ваша меркаваньне

Паказаць камэнтары

XS
SM
MD
LG