Лінкі ўнівэрсальнага доступу

Справа Бандарэнкі перададзеная ў суд


Андрэй Бандарэнка

Магілёўская пракуратура накіравала крымінальную справу супраць Андрэя Бандарэнкі ў суд Ленінскага раёну Магілёва. Паводле праваабаронцаў, дату суду могуць прызначыць бліжэй да сярэдзіны лютага.

Андрэя Банадарэнку вінавацяць у злосным непадпарадкаваньні патрабаваньням адміністрацыі папраўчай установы. За гэта вязьню пагражае пазбаўленьне волі на тэрмін да двух гадоў, паведамляе праваабарончы цэнтар «Вясна».

Праваабаронцам стала вядома, што справу перадалі ў суд 18 студзеня. У пракуратуры справа разглядалася ўсяго адзін дзень — 17 студзеня. Пакуль невядома, як будзе праходзіць судовы працэс: даставяць Андрэя Бандарэнку ў суд Ленінскага раёну ці справа будзе разгледжана на тэрыторыі турмы, як гэта адбылося са зьняволеным гэтай жа ўстановы, былым палітвязьнем Мікалаем Дзядком.

У выпадку асуджэньня Бандарэнкі праваабаронцы будуць гатовыя прызнаць яго палітзьняволеным.

Сябра «Вясны» Тацяна Равяка напісала ў фэйсбуку, што працэс будзе адкрыты і ёсьць шанец, што Андрэя прывязуць у суд і ўсе змогуць туды трапіць.

«Ёсьць варыянт, што суд зробяць выязным і будуць праводзіць яго на тэрыторыі турмы, як гэта было зь Мікалаем Дзядком. Тады толькі пусьцілі жонку і бацьку Мікалая.

Але яшчэ раз нагадваю — судовы працэс адкрыты, і суд павінен забясьпечыць гэта — ці ў сваім памяшканьні, ці на тэрыторыі турмы».

Андрэй Бандарэнка моцна абмежаваны ў перапісцы: ягоныя лісты не выходзяць за сьцены турмы, і невядома, ці атрымлівае сам вязень лісты, адрасаваныя яму. Таксама яго пазбавілі адзінага на год кароткатэрміновага спатканьня.

8 лютага ў Магілёўскім абласным судзе пройдзе касацыйны разгляд скаргі на спагнаньне, якое было вынесена Андрэю Бандарэнка за нібыта няякасна зробленыя канвэрты, а таксама за тое, што не прадставіў рапарт супрацоўніку турмы адпаведным чынам.

19 сьнежня суд Ленінскага раёну Магілёва стаў на бок адміністрацыі турмы № 4 і адхіліў скаргу асуджанага.

Андрэй Бандарэнка — былы кіраўнік праваабарончай арганізацыі «Плятформа Інавэйшн», якая займалася маніторынгам месцаў зьняволеньня. У 2014 годзе яго прызналі вінаватым у хуліганстве, злосным хуліганстве і асабліва злосным хуліганстве ў дачыненьні да трох грамадзян і асудзілі на 3 гады калёніі ўзмоцненага рэжыму.

Усяго на Андрэя Бандарэнку накладзена больш за дзясятак спагнаньняў у розных месцах пазбаўленьня волі, дзе ён адбываў тэрмін. З гэтай прычыны былы кіраўнік «Плятформы Інавэйшн» прызнаны злосным парушальнікам рэжыму.

Цяперашні тэрмін зьняволеньня Андрэя Бандарэнкі заканчваецца 31 сакавіка 2017 году.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG