Дзьве вуліцы, якія праектуюцца ў менскім мікрараёне Лошыца, названы ў гонар народнага артыста СССР Віктара Турава і народнага артыста Беларусі, кінарэжысэра Міхаіла Пташука.
Адмысловае рашэньне Менскага гарсавету ад 16 кастрычніка апублікаваў нацыянальны прававы інтэрнэт-партал.
Кіраўніца ўправы культуры менскага гарвыканкаму Віталіна Рудзікава сказала журналістам, што Міністэрства культуры і прадстаўнікі творчых зьвязаў шмат разоў прасілі гарадзкія ўлады ўвекавечыць імёны рэжысэраў, якія «зрабілі значны ўклад у разьвіцьцё беларускага кіно».
Паводле Белсату, упершыню ў менскай тапамініміцы вуліцам нададзены імёны беларускіх кінарэжысэраў.
Гэтым жа рашэньнем праезду ад вуліцы Ракаўскай да вуліцы Раманаўская Слабада вернута гістарычная назва — вуліца Ю́рава-Зава́льная.