«Іх стратэгія, якая заключаецца ў павелічэньні стаўкі на Асада, зьяўляецца памылковай», — сказаў прэзыдэнт Абама падчас сустрэчы з амэрыканскімі вайскоўцамі. Яна, паводле словаў Барака Абамы, асуджаная на правал.
Гэта заява прэзыдэнта прагучала пасьля шматлікіх паведамленьняў у амэрыканскай прэсе пра тое, што Расея ў апошні час рэзка павялічыла ваенныя пастаўкі ў Сырыю. Паводле некаторых зьвестак, у гэтую краіну перакідваюцца расейскія вайскоўцы і тэхніка. Да гэтага часу прадстаўнікі Злучаных Штатаў абмяжоўваліся стрыманымі папярэджаньнямі ў адрас Масквы.
Прэзыдэнт Абама падкрэсьліў, што дзеяньні Масквы падрываюць пошукі палітычнага ўрэгуляваньня праблемы. Паводле словаў прэзыдэнта, такія дзеяньні «могуць не дазволіць нам дасягнуць палітычнага рашэньня, якое неабходна для таго, каб вярнуць мір у Сырыю».
У апошнія месяцы Белы дом выказваў надзею на магчымасьць супрацоўніцтва з Крамлём у пошуку палітычнага дазволу сырыйскага крызісу. Раптоўнае рэзкае пашырэньне маштабаў расейскай дапамогі Багдаду стала, як паведамляе амэрыканская прэса, поўнай нечаканасьцю для Белага дому.
Згодна з заявамі расейскіх прадстаўнікоў, Масква пастаўляе ўзбраеньне Сырыі для барацьбы з групоўкай «Ісламская дзяржава».
