У аўторак некалькі амэрыканскіх СМІ са спасылкай на крыніцы ў амэрыканскай выведцы паведамілі, што Расея павялічыла колькасьць палётаў транспартных самалётаў у Сырыю.
Паводле зьвестак тэлекампаніі Foxnews, у апошнія дні было зафіксавана некалькі палётаў расейскіх самалётаў у Сырыю. У аўторак у аэрапорце Латакіі на міжземнаморскім узьбярэжжы краіны прызямліўся расейскі Ан-124 «Руслан», найбуйнейшы ў сьвеце ваенна-транспартны самалёт.
Інфармацыйнае агенцтва France Presse паведамляе, што ў аэрапорт Латакіі ў апошнія дні зьдзейсьнілі палёты два Ан-124 і расейскі пасажырскі самалёт.
У канцы мінулага тыдня газэта The New York Times напісала, што Расея даставіла ў Латакію зборныя дамы і абсталяваньне для кантролю за паветраным рухам, што прымусіла амэрыканскіх вайскоўцаў выказаць здагадку, што Расея мае намер арганізаваць там базу для вядзеньня паветраных апэрацыяў.
У аўторак Белы дом выказаў асьцярогі з нагоды сырыйскіх плянаў Крамля.
«Мы далі зразумець, што Злучаныя Штаты занепакоеныя паведамленьнямі пра тое, што Расея магла дысьлякаваць у Сырыі дадатковы вайсковы пэрсанал і самалёты», — заявіў прэс-сакратар Белага дома Джош Эрнэст.
Паводле яго слоў, гэтыя крокі могуць прывесьці да росту стратаў сярод мірнага насельніцтва, павялічыць плынь уцекачоў і прывесьці да канфрантацыі з кааліцыяй, якая вядзе дзеяньні супраць групоўкі «Ісламская дзяржава».
