Сёньня Атэны атрымаюць 23 мільярды эўра, што дазволіць ім пагасіць каля трох з паловай мільярдаў эўра доўгу ў рамках абслугоўваньня крэдыту, выдадзенага Эўрапейскім цэнтральным банкам.
Учора міністры фінансаў краінаў эўразоны афіцыйна ўхвалілі першы транш новага, трэцяга пакета фінансавай дапамогі Грэцыі.
Раней у сераду парлямэнты ўсіх краінаў эўразоны падтрымалі рашэньне аб дапамозе Грэцыі.
Ключавым стала галасаваньне ў бундэстагу Нямеччыны, якая зьяўляецца найбуйнейшым крэдыторам Атэнаў.
Агульны аб’ём новага, трохгадовага пляна крэдытаваньня Грэцыі складзе 86 мільярдаў эўра.
У адказ Грэцыя, якая перажывае востры фінансавы крызіс, абавязалася правесьці шэраг рэформаў, накіраваных на скарачэньне бюджэтных выдаткаў і ўзмацненьне кантролю за банкаўскай сфэрай.
