Сэнат ЗША падтрымаў разгляд законапраекту аб санкцыях супраць Расеі, падрыхтаваны сэнатарам Грэмам

• 28 ліпеня 86 сяброў Сэнату ЗША прагаласавалі за працэдуру разгляду заканадаўчага акту, накіраванага на ўзмацненьне эканамічнага ціску на Расею і Іран. Супраць выступілі толькі 12 сэнатараў.

Як паведаміў карэспандэнт Радыё Свабодная Эўропа / Радыё Свабода, працэдурнае галасаваньне, што адбылося празь некалькі гадзін пасьля разьвітаньня з сэнатарам Ліндсі Грэмам з Паўднёвай Караліны, вядучага аўтара законапраекту, адбылося адразу пасьля таго, як прэзыдэнт Украіны Ўладзімір Зяленскі сустрэўся з сэнатарамі за зачыненымі дзьвярыма. Зяленскі быў ў залі падчас галасаваньня.

Прэзыдэнт Украіны Ўладзімір Зяленскі на сустрэчы з сэнатарамі ЗША падчас візыту ў Вашынгтон 28 ліпеня 2026 году

Законапраект, цяпер афіцыйна названы «Законам Ліндсі Грэма аб санкцыях супраць Расеі і Ірану 2026 году», упаўнаважвае Трампа ўводзіць тарыфы да 200 адсоткаў для найбуйнейшых пакупнікоў расейскай нафты і прыроднага газу, адначасова пашыраючы санкцыі, накіраваныя на расейскія фінансавыя ўстановы, палітычныя эліты, алігархаў і «ценевы флёт», які выкарыстоўваюць для абыходу дзейных абмежаваньняў.

Ён таксама падаўжае санкцыі супраць Ірану да 2031 году.

Нягледзячы на тое, што законапраект усё яшчэ чакае зацьверджаньня ў Сэнаце і далейшага разгляду ў Палаце прадстаўнікоў ЗША пасьля жнівеньскага перапынку, працэдурнае галасаваньне падкрэсьліла рэдкі двухпартыйны кансэнсус наконт таго, што эканамічны ціск застаецца адным з самых магутных інструмэнтаў Вашынгтону супраць Масквы.

Сэнатары ня раз называлі законапраект ня проста чарговым пакетам санкцыяў, а стратэгічнай спробай пазбавіць прэзыдэнта Расеі Ўладзіміра Пуціна даходаў, якія фінансуюць вайну Расеі ва Ўкраіне.

Што сказаў сэнатарам Зяленскі

Пасьля сустрэчы з сэнатарамі Зяленскі сказаў, што значэньне гэтага заканадаўчага акту выходзіць далёка за межы яго беспасярэдняга эканамічнага ўзьдзеяньня.

«Гэты законапраект вельмі важны, — заявіў Зяленскі. — Санкцыйны ціск на Расею вельмі важны. Ідзецца ня толькі пра грошы, якія Расея выкарыстоўвае для фінансаваньня гэтай вайны. Гэта таксама вялікі сыгнал для Эўропы, вялікі сыгнал для Ўкраіны і вялікая падтрымка нашага народу».

Прэзыдэнт Украіны выказаў надзею, што дакумэнт стане законам, падзякаваў за дзьвюхпартыйную дыскусію і выказаў аптымізм наконт яе станоўчага выніку.

Зяленскі адзначыў, што размова, акрамя санкцыяў, у асноўным тычылася патрэбаў Украіны на полі бою, у тым ліку ўмацаваньня абароннай прамысловасьці краіны.

Ён сказаў, што Ўкраіна хоча пашырыць вытворчасьць сыстэмаў, здольных зьнішчаць бесьпілётнікі Shahed іранскай вытворчасьці і расейскія дроны, працягваючы пры гэтым разьвіваць сучасныя магчымасьці радыёэлектроннай барацьбы.

У той жа час Зяленскі падкрэсьліў, што найбольш актуальнай вайсковай патрэбай Кіева застаецца дадатковая супрацьпаветраная абарона.

«Сапраўдная праблема — гэта супрацьбалістычныя сыстэмы і супрацьбалістычныя ракеты», — сказаў Зяленскі і дадаў, што ён ужо агучваў гэта раней, на сустрэчы з прэзыдэнтам Дональдам Трампам.

Галоўная асаблівасьць законапраекту аб санкцыях — ён скіраваны на дзяржавы, што працягваюць купляць расейскую нафту і прыродны газ, нягледзячы на вайну Расеі супраць Украіны.

Сэнатары ня раз падкрэсьлівалі, што дакумэнт значна скарочаны ў параўнаньні з папярэднімі праектамі, каб унікнуць пакараньня хаўрусьнікаў ЗША і адначасова сканцэнтраваць эканамічны ціск на ключавых пакупніках, якія фінансуюць вайну Расеі.

З моманту ўступленьня на пасады адміністрацыі Трампа Злучаныя Штаты ўнікалі ўводу шырокіх санкцыяў супраць Расеі й імкнуліся да ролі пасярэдніка ў спыненьні вайны. Законапраект аб санкцыях доўга не разглядаўся ў Кангрэсе. Цяпер Трамп сыгналізуе, што гатовы ўхваліць яго з папраўкамі.

«8 із 10». Віткофф і Кушнер їдуть до Києва. Деталі домовленостей президентів України й США у Вашингтоні

Перад сустрэчай з сэнатарамі у Зяленскага была размова з Трампам

Перад галасаваньнем у Сэнаце Уладзімір Зяленскі сустрэўся з прэзыдэнтам ЗША Дональдам Трампам. Размова праходзіла ў Белым доме за зачыненымі дзьвярыма.

Пазьней Дональд Трамп заявіў, што сустрэча была пазытыўнай.

«Для мяне было вялікім гонарам сустрэцца з прэзыдэнтам Украіны Зяленскім. Мы абмеркавалі шмат пытаньняў. Сустрэча прайшла вельмі добра!» — працытавалі Трампа на старонцы Белага дому ў сацыяльнай сетцы Х.

Прэзыдэнт Уладзімір Зяленскі прыбыў у ЗША 28 ліпеня. Сустрэча з прэзыдэнтам Трампам працягвалася прыблізна гадзіну і прайшла без удзелу СМІ.

Як відаць на апублікаваных фота, у склад украінскай дэлегацыі на перамовах уваходзілі кіраўнік Офісу прэзыдэнта Кірыла Буданаў, яго намесьнікі Сяргей Кісліца і Павел Паліса, сакратар Рады нацыянальнай бясьпекі і абароны Рустэм Умераў, кіраўнік МЗС Андрэй Сыбіга, кіраўнік фракцыі «Слуга народу» ў парлямэнце Давід Арахамія, а таксама пасол Украіны ў ЗША Вольга Стэфанішына.

Зяленскі таксама назваў сустрэчу з Трампам «добрай». Паводле яго, на ёй абмеркавалі ліцэнзіі на вытворчасьць перахопнікаў для сыстэмаў Patriot і «некаторыя іншыя ідэі, якія могуць дапамагчы», а таксама важнасьць актывізацыі дыпляматычнага працэсу.

Раней Белы дом заявіў, што сустрэчы Трампа з прэзыдэнтам Украіны Ўладзімірам Зяленскім і прэм’ер-міністрам Ізраілю Біньямінам Нэтаньягу былі «пазытыўнымі і прадуктыўнымі».