Памёр амэрыканскі сэнатар-рэспубліканец Ліндсі Грэм. Ён выступаў за дэмакратычныя перамены ў Беларусі

11 ліпеня памёр амэрыканскі сэнатар ад штату Паўднёвая Караліна Ліндсі Грэм. Пра гэта раніцай 12 ліпеня паведаміў ягоны офіс.

Паводле заявы, сэнатар памёр увечары ў выніку раптоўнай хваробы. Дзе менавіта наступіла сьмерць, у паведамленьні не ўдакладняецца. Паводле газэты The Washington Post, увечары 11 ліпеня мэдыкаў выклікалі ў дом Грэма ў Вашынгтоне.

Ліндсі Грэму быў 71 год. Яшчэ 10 ліпеня ён знаходзіўся ў Кіеве, дзе сустрэўся з прэзыдэнтам Украіны Ўладзімірам Зяленскім. Падчас сустрэчы ён, сярод іншага, заявіў, што з адміністрацыяй Белага дому ўдалося ўзгадніць законапраект аб узмацненьні санкцыяў супраць Расеі.

Грэм атрымаў юрыдычную адукацыю, служыў у войску ў якасьці вайсковага пракурора, а пасьля пачаў палітычную кар’еру. У Сэнат ЗША ён быў упершыню абраны ў 2002 годзе і стаў адным з найбольш вядомых рэспубліканскіх палітыкаў у верхняй палаце Кангрэсу.

Ціханоўская пра сыход Ліндсі Грэма

Спачуваньні ў сувязі са сьмерцю амэрыканскага сэнатара Ліндсі Грэма выказала на сваёй старонцы ў сацсетцы Х лідэрка дэмсілаў Беларусі Сьвятлана Ціханоўская.

«Я мела гонар сустрэцца з ім і пераканацца ў яго цьвёрдай прыхільнасьці свабодзе, дэмакратыі і бяспецы ў нашым рэгіёне», — адзначыла палітык.

Спачуваньні яна выказала сям’і сэнатара, яго калегам і жыхарам штата Паўднёвая Караліна.

Раней Ціханоўская сустракалася з Грэмам падчас наведваньня ЗША.

ГЛЯДЗІЦЕ ТАКСАМА:

У ЗША два сэнатары прадставілі законапраект аб прызнаньні Расеі краінай-спонсарам тэрарызму

Грэм пра вайну Расеі супраць Украіны

Яшчэ да анэксіі Крыму Расеяй і пачатку поўнамаштабнай вайны ва Ўкраіне Грэм выступаў за жорсткую палітыку адносна Масквы. Ён актыўна падтрымліваў Украіну, неаднаразова наведваў Кіеў і быў суаўтарам законапраектаў аб дапамозе Ўкраіне і санкцыях супраць Расеі.

У 2023 годзе Міністэрства ўнутраных справаў Расеі абвясьціла Грэма ў вышук празь ягоныя выказваньні пра вайну. Расейскія ўлады заявілі, што ён нібыта казаў пра тое, што гібель расейцаў — гэта «лепшае ўкладаньне грошай ЗША». Сам Грэм такой фразы не казаў. Пасьля гэтага намесьнік старшыні Рады бясьпекі Расеі Дзьмітрый Мядзьведзеў заявіў, што ў ЗША «рэгулярна забіваюць ня толькі звычайных людзей, але і трацяць брудныя грошы на забойствы сэнатараў».

Першапачаткова Грэм быў крытыкам Дональда Трампа, але пазьней стаў адным з найбольш пасьлядоўных саюзьнікаў прэзыдэнта ЗША ў Сэнат. Ён таксама падтрымліваў амэрыканскую ваенную апэрацыю супраць Ірану і выступаў у падтрымку Ізраілю.

Дональд Трамп выказаў спачуваньні ў сувязі са сьмерцю Грэма, назваўшы яго «адным з найвыдатнейшых людзей і сэнатараў, якіх я калі-небудзь ведаў».

ГЛЯДЗІЦЕ ТАКСАМА:

Беларускія апазыцыянэры сустрэліся ў Вільні з сэнатарам Джонам Маккейнам