У Запароскай вобласьці штодзень ад абстрэлаў цярпяць дзясяткі паселішчаў
Улады Запароскай вобласьці паведамілі, што за апошнія 24 гадзіны ад расейскіх абстрэлаў загінулі яшчэ тры чалавекі і адзін атрымаў раненьні. Ад атак пацярпелі 53 населеныя пункты рэгіёну.
Пад заваламі школы ў пасёлку Камышуваха, на якую расейскія войскі 2 лістапада скінулі 9 авіябомбаў, знайшлі яшчэ некалькі целаў загінулых. Цяпер агульная колькасьць ахвяраў вырасла да 40 чалавек. Яшчэ 30 чалавек могуць заставацца пад заваламі. 5 лістапада ў рэгіёне працягваецца жалоба, шукаюць пацярпелых.
ГЛЯДЗІЦЕ ТАКСАМА:
У Запароскай вобласьці — тры дні жалобы. 37 чалавек загінулі, ратаўнікі шукаюць пацярпелых пад заваламіУ Днепрапятроўскай вобласьці тры чалавекі параненыя
У ноч на 5 лістапада расейскія войскі атакавалі Дніпро і Самар. Тры чалавекі атрымалі раненьні. Пацярпелі аб’екты крытычнай інфраструктуры. Ратаўнікі змагаюцца з пажарамі ў месцах лучаньня расейскіх дронаў.
Праз пашкоджаньне энэргетычных аб’ектаў на тэрыторыі ўсёй Украіны абмежавалі энэргазабесьпячэньне ня толькі для прамысловых спажыўцоў, але і для звычайных грамадзян.
ГЛЯДЗІЦЕ ТАКСАМА:
Расея атакавала ЦЭС па ўсёй Украіне. У Харкаве і Дніпры больш за 50 чалавек параненыя, гарады безь цяпла і сьвятлаУкраінскія дроны пацэлілі ў нафтавы аб’ект у Разані
Украінскія маніторынгавыя каналы паведамілі, што ў ноч на 5 лістапада ў выніку пацэльваньня ўкраінскіх войскаў пачаліся пажары на Разанскім нафтаперапрацоўчым заводзе і мясцовым складзе Wildberries. Мясцовыя жыхары паведамілі аб шматлікіх выбухах у горадзе.
Разанскі НПЗ уваходзіць у чацьвёрку найбольшых прадпрыемстваў у Цэнтральнай фэдэральнай акрузе Расеі. Яго праектная магутнасьць — больш за 17 мільёнаў тон нафты на год, што складае амаль 5% прадукцыі ўсіх нафтаперапрацоўчых заводаў краіны.
Губэрнатар Разанскай вобласьці Павел Малкоў заявіў аб «масаванай атацы БПЛА». Ён паведаміў аб пажарах на тэрыторыі прамысловых аб’ектаў, але не назваў іх. Апроч таго, былі пашкоджаныя лініі электраперадач, у выніку чаго ў частцы гораду пачаліся перабоі ў энэргазабесьпячэньні.
Губэрнатар таксама дадаў, што ў выніку абстрэлаў пашкоджаныя школа і прыватныя дамы. Адзін чалавек пацярпеў.
Ва Ўкраіне гэтай інфармацыі пакуль не камэнтуюць. Апошні такі магутны ўдар па Разані быў сёлета ў ліпені.
ГЛЯДЗІЦЕ ТАКСАМА:
Украінскія дроны атакавалі НПЗ і склад Wildberries у расейскай РазаніВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.