Амэрыканцы Робэрт Гол і Майкл Вудфард атрымалі Нобэлеўскую прэмію ў эканоміцы за 2026 год за «мікраэканамічныя асновы макраэканамічнай стабілізацыі», паведаміла ў панядзелак швэдзкая Каралеўская акадэмія навук, піша Reuters.
Прэстыжная ўзнагарода, афіцыйна вядомая як прэмія Цэнтральнага банку Швэцыі ў эканамічных навуках у памяць Альфрэда Нобэля, — апошняя ўзнагарода, прызнаная сёлета. Яна складае 12 мільёнаў швэдзкіх крон (1,2 мільёна даляраў ЗША).
Прэмія ў эканоміцы, упершыню прысуджаная ў 1969 годзе, не была сярод пяці першапачатковых узнагародаў, заснаваных паводле запавету прамыслоўца і вынаходніка дынаміту Альфрэда Нобэля ў 1895 годзе, а была заснаваная Цэнтральным банкам Швэцыі.
Большасьць папярэдніх ляўрэатаў былі з ЗША. Яе атрымалі толькі тры жанчыны, апошні раз — Клаўдыя Гольдзін, якая ў 2023 годзе атрымала прэмію за працу аб тым, як гендэр цягам часу ўплываў на заработную плату і занятасьць у ЗША.
Ляўрэаты Нобэлеўскіх прэміяў у мэдыцыне, фізыцы, хіміі, літаратуры і прэміі міру былі абвешчаныя на мінулым тыдні.