«Асабліва пры абвастрэньні абстаноўкі варта працаваць маналітам. Забесьпячэньне правапарадку і бясьпекі ў краіне — задача агульная. І ў практычнай дзейнасьці ёсьць прыклады, калі ўсе сапраўды згуртаваліся ў барацьбе з пагрозай», — працытавала Кубракова прэсавая служба Міністэрства ўнутраных спраў Беларусі.
У паведамленьні адзначаецца, што Кубракоў зьвярнуў увагу на пытаньні інфармацыйнай бясьпекі: адсочваньне настрояў на прадпрыемствах, кантроль за зьместам групавых чатаў. «Гэта сёньня актуальна», — адзначылі ў МУС Беларусі.
Кубракоў даручыў сфарміраваць сьпісы вэтэранаў і дружыньнікаў, якія гатовыя будуць далучыцца да сілавікоў «у выпадку ўскладненьня абстаноўкі».
Што папярэднічала
У Горадні, Лідзе і Вялікай Бераставіцы 29–30 ліпеня праходзяць комплексныя камандна-штабныя вучэньні для праверкі гатоўнасьці падразьдзелаў Міністэрства ўнутраных справаў да дзеяньняў «у асаблівых умовах».
ГЛЯДЗІЦЕ ТАКСАМА:
На Горадзеншчыне ў памежжы зь Літвой праводзяць вучэньні падразьдзелаў МУС на выпадак «асаблівых умоваў»Чаму гэта важна
Сёлета з сакавіка амаль ува ўсіх рэгіёнах Беларусі праводзяць вучэньні падразьдзелаў МУС. У некалькіх выпадках улады ўдакладнялі мэту іх правядзеньня — на выпадак тэрарыстычных актаў, патрэбы прыкрыцьця дзяржаўнай мяжы, стварэньня рэзэрваў і іх своечасовай перадысьлякацыі пры патрэбе або для спыненьня «масавых беспарадкаў».
Такія вучэньні ўжо прайшлі ў Віцебскай, Берасьцейскай і Магілёўскай вобласьцях.
З пачатку поўнамаштабнай вайны Расеі супраць Украіны ў 2022 годзе на тэрыторыі Беларусі, улады якой падтрымалі гэтую агрэсію, практычна безь перапынку праводзяць вучэньні вайсковых і іншых парамілітарных падразьдзелаў.
Аляксандар Лукашэнка ня раз заяўляў аб пагрозах ад Украіны і іншых суседзяў Беларусі, у тым ліку тэрарыстычных. Гэта аніразу ня мела пацьверджаньня.