Найбольш пацярпелі заходнія рэгіёны Ўкраіны. Праз удар па Закарпацьці, якое мяжуе з Вугоршчынай, міністарка замежных справаў краіны Аніта Орбан выклікала расейскага пасла ў Будапэшце. З гэтай жа прычыны Славаччына закрывала мяжу з Украінай.
Дроны, якімі расейскія войскі атакавалі Ровенскую і Жытомірскую вобласьці, ляцелі над тэрыторыяй Беларусі.
У памежных зь Беларусьсю вобласьцях ёсьць загінулыя і параненыя
У Ровенскай вобласьці чатыры чалавекі атрымалі раненьні і тры загінулі. Пад ударам была сацыяльная інфраструктура.
У Жытомірскай вобласьці — два чалавекі атрымалі раненьні, пашкоджана цывільная і транспартная інфраструктура ў некалькіх раёнах.
Украінскія маніторынгавыя каналы паведамілі, што сама меней тры расейскія дроны заляцелі ў гэтыя рэгіёны праз тэрыторыю Беларусі, два зь іх зафіксавалі недалёка ад Брагіна Гомельскай вобласьці.
Увечары 13 траўня ў апэратыўным камандаваньні Паветраных сіл Украіны пацьвердзілі гэтую інфармацыю. «Асноўны кірунак удару — заходнія рэгіёны краіны. Асаблівасьць атакі — праціўнік чарговы раз выкарыстаў тэрыторыю Беларусі і Малдовы для пралёту ўдарных БПЛА ў бок Украіны», — сказана ў афіцыйным паведамленьні.
ГЛЯДЗІЦЕ ТАКСАМА:
Ва Ўкраіне назвалі апэратараў, якія забясьпечваюць роўмінг расейскім дронам. Сярод іх — і беларускіяУ Кіеве шукаюць людзей пад заваламі зьнішчанага расейскім ударам жылога дому
У сталіцы Ўкраіны ад расейскіх абстрэлаў пацярпелі 5 зь 10 адміністрацыйных раёнаў. У Дарніцкім раёне ў выніку ўдару абрынуліся канструкцыі шматпавярховага жылога дому. Гарадзкія ўлады паведамілі, што раненьні і траўмы атрымалі сама меней 40 чалавек, у тым ліку месячнае немаўля. Паводле папярэдніх зьвестак, пяць чалавек загінулі, больш за 10 лічаць зьніклымі бязь вестак.
У іншых раёнах Кіева таксама пацярпелі жылыя дамы, вэтэрынарная клініка, гарэлі аўтамабілі.
У Кіеўскай вобласьці ад удару пацярпелі пяць раёнаў. Удары наносіліся па жылым сэктары, прадпрыемствах і гаспадарчых пабудовах. Сем чалавек атрымалі раненьні.
У Івана-Франкоўску пацярпелі 10 чалавек, у тым ліку два падлеткі. Улады паведамілі аб пацэльваньні ў шматпавярховы дом у цэнтры гораду, а таксама ў гаспадарчыя пабудовы.
Пацярпела энэргетычная інфраструктура, а таксама порт у Чарнаморску Адэскай вобласьці.
ГЛЯДЗІЦЕ ТАКСАМА:
Новы ўдар Расеі па Кіеве, Дніпры і Херсоне. У Пермі пажар на нафтавай станцыі патушылі на 12-ы дзеньЗа апошнія два дні па Ўкраіне запусьцілі амаль 1,5 тысячы дронаў
У апэратыўным камандаваньні Паветраных сілаў Украіны паведамілі, што з ночы 12 траўня да вечара 13 траўня расейскія войскі атакавалі краіну 892 ударнымі дронамі.
Зь вечара 13 траўня да раніцы 14 траўня ва Ўкраіне зафіксавалі прылёты 675 дронаў і 56 ракет. Асноўны кірунак удару — Кіеў.
Згодна з інфармацыяй на раніцу, сілы супрацьпаветранай абароны зьбілі 41 ракету і 652 бесьпілётнікі. 15 ракет і 23 дроны пацэлілі па 24 лякацыях.
Атака працягваецца дагэтуль.
ГЛЯДЗІЦЕ ТАКСАМА:
Як пад абстрэламі і бомбамі ў Запароскай вобласьці ідзе пасяўная. ВІДЭАВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.