23 студзеня спрабавалі прадаць:
- паштовую станцыю ХІХ стагодзьдзя ў Сеньненскім раёне Віцебскай вобласьці,
- кузьню сядзібы шляхцічаў Мядзьведзкіх у Бешанкавіцкім раёне,
- будынак кляштару кармэлітаў у Глыбокім,
- сядзібу роду Сьвяцкіх у Сеньненскім раёне.
15 студзеня плянавалі прадаць маёнтак Падароск, што ў Ваўкавыскім раёне Горадзенскай вобласьці, а 22 сьнежня 2025 году — «Мураванку Храптовічаў» XVIII стагодзьдзя.
Як вынікае з інфармацыі на сайце біржы, адбыўся толькі адзін аўкцыён — будынак кляштару кармэлітаў у Глыбокім, які ўлады спрабавалі прадаць з 2019 году, нарэшце знайшоў свайго ўласьніка. Для ўдзелу ў таргах зарэгістраваўся толькі адзін удзельнік, які і перамог у аўкцыёне — ён набыў гістарычны будынак за 47,25 рубля пры стартавай цане ў 45 рублёў.
Усе іншыя аўкцыёны не адбыліся — не было ніводнага ахвочага ў іх удзельнічаць.
Кляштар і касьцёл Унебаўзяцьця Найсьвяцейшай Панны Марыі пабудавалі ў 1639–1654 гадох на грошы фундатара — ваяводы амсьціслаўскага і старосты дзісенскага Язэпа Корсака.
У 1831 годзе манахі-кармэліты падтрымалі вызвольнае паўстаньне супраць расейскага панаваньня, а кляштарныя сутарэньні сталі месцам для захоўваньня арсэналу зброі, лячэньня параненых і схованкай для паўстанцаў.
У 1865-м, ужо пасьля паўстаньня 1863 году, кляштар закрылі, а касьцёл з 1875 году стаў праваслаўнай царквой. У жылым корпусе ў розныя гады дзейнічалі пансіён, бібліятэка, шпіталь, склады. На сёньня захавалася толькі адно крыло корпусу, два іншыя разабралі расейскія захопнікі ў 1892 годзе.
Аб’ект становіць сабой двухпавярховы цагляны будынак плошчай 1280 квадратных мэтраў з падвалам, пры ім пляц 10 сотак з правам арэнды на 40 гадоў. Новы ўласьнік мае падпісаць ахоўныя абавязкі, бо гэты аб’ект ёсьць гістарычна-культурнай каштоўнасьцю.
Пакуль невядома, хто набыў ва ўласнасьць гістарычны будынак у Глыбокім.
ГЛЯДЗІЦЕ ТАКСАМА: У Глыбокім зноў выставілі на продаж будынак кляштара кармэлітаў, якія падтрымлівалі антырасейскае паўстаньне