Прэзыдэнт ЗША Джо Байдэн у сваім пасланьні да Кангрэсу ЗША аб становішчы краіны зьвярнуўся да Ўкраіны, заявіўшы, што Злучаныя Штаты акажуць падтрымку «столькі, колькі неабходна».
«Сёньня да нас зноў далучаецца амбасадарка Ўкраіны ў ЗША. Яна ўвасабляе ня толькі сваю краіну, але і мужнасьць свайго народу. Спадарыня амбасадар, Амэрыка адзіная ў падтрымцы вашай краіны. Мы будзем з вамі столькі, колькі спатрэбіцца. Наша краіна імкнецца да большай свабоды, годнасьці і міру не толькі ў Эўропе, але паўсюль», — сказаў Байдэн.
Ён нагадаў, што год таму прэзыдэнт Расеі Ўладзімір Пуцін разьвязаў жорсткую вайну супраць Украіны.
Байдэн назваў яе «забойчым нападам, які выклікае ў памяці вобразы сьмерці і разбурэньняў, якія зазнала Эўропа падчас Другой сусьветнай вайны».
«Я казаў у гэтай залі пра жорсткую вайну Ўладзіміра Пуціна супраць Украіны. Гэта было выпрабаваньне для Амэрыкі, для ўсяго сьвету. Ці будзем мы адстойваць самыя асноўныя прынцыпы? Ці будзем мы абараняць сувэрэнітэт? Ці будзем мы абараняць права людзей жыць свабоднымі ад тыраніі? Ці будзем мы выступаць за дэмакратыю?...Праз год мы ведаем адказ: так, будзем! І так, мы зрабілі! Мы зрабілі гэта!
Разам мы рабілі тое, што Амэрыка заўсёды робіць лепш за ўсё. Мы аб’ядналі NATO і стварылі глябальную кааліцыю. Мы выступілі супраць агрэсіі Пуціна. Мы сталі на бок украінскага народа», — падкрэсьліў прэзыдэнт ЗША.
ГЛЯДЗІЦЕ ТАКСАМА:
ЗША абвясьцілі пра новы пакет вайсковай дапамогі Ўкраіне, у ім ракеты для HIMARS, якія б’юць на 150 кмПрамова адбылася менш чым за тры тыдні да першай гадавіны поўнамаштабнага ўварваньня Расеі ва Ўкраіну. 3 лютага Злучаныя Штаты Амэрыкі абвясьцілі аб новым пакеце ваеннай дапамогі Ўкраіне на 2,2 млрд даляраў.
Усяго з пачатку поўнамаштабнага расейскага ўварваньня 24 лютага 2022 года ЗША выдзелілі Ўкраіне больш за 27,1 мільярда даляраў дапамогі ў галіне бясьпекі.
ГЛЯДЗІЦЕ ТАКСАМА:
У Ровенскай вобласьці на мяжы зь Беларусьсю ствараюць новы фармат фартыфікацыйЗварот да рэспубліканцаў: «Няма прычын, па якіх мы не маглі б працаваць разам»
Сёлетні зварот да Кангрэсу адбыўся, калі рэспубліканцы ўзялі пад кантроль Палату прадстаўнікоў на лістападаўскіх прамежкавых выбарах.
Некаторыя рэспубліканцы выказалі занепакоенасьць цаной, якую плацяць ЗША, падтрымліваючы Ўкраіну.
Выступ Джо Байдэна ў Кангрэсе
У сваім першым выступленьні на сумесным пасяджэньні Кангрэса пасьля таго, як рэспубліканцы ўзялі пад свой кантроль Палату прадстаўнікоў у студзені гэтага года, прэзыдэнт-дэмакрат Байдэн згадаў таксама аб эканамічным росьце пасьля пандэміі COVID-19, асабліва адзначыўшы маштабныя законапраекты аб інфраструктуры і скарачэньні інфляцыі, прынятыя ў 2022 годзе. Ён падкрэсьліў, што расколаты Кангрэс можа прымаць новыя законы ў найбліжэйшай будучыні.
«Маім сябрам-рэспубліканцам: калі мы маглі працаваць разам у мінулым скліканьні Кангрэса, няма прычын, па якіх мы не маглі б працаваць разам у новым Кангрэсе. Людзі даслалі нам выразны сігнал. Барацьба дзеля барацьбы, сіла дзеля ўлады, канфлікт дзеля канфлікту ні да чаго нас не прывядуць. Нас паслалі сюды, каб завяршыць працу», — гаворыцца ў выступе.
ГЛЯДЗІЦЕ ТАКСАМА:
Рэспубліканцы атрымалі нязначную большасьць у Палаце прадстаўнікоў ЗШАЗварот да Кітая: «Мы імкнемся да канкурэнцыі, а не да канфлікту»
Прэзыдэнт ЗША Джо Байдэн заявіў у сваім выступе, што ён гатовы працаваць з Кітаем, але паабяцаў «абараняць краіну», верагодна, маючы на ўвазе інцыдэнт з кітайскай шпіёнскай ракетай, якая праляцела над Злучанымі Штатамі на мінулым тыдні.
«Я ясна даў зразумець прэзыдэнту Сі, што мы імкнемся да канкурэнцыі, а не да канфлікту. Я ня буду прыносіць прабачэньні за нашы інвэстыцыі ў тое, каб зрабіць Амэрыку моцнай. Гэта інвэстыцыі ў амэрыканскія інавацыі, у галіны, якія будуць вызначаць будучыню і ў якіх кітайскі ўрад мае намер дамінаваць. Сёньня мы знаходзімся ў наймацнейшай пазыцыі за апошнія дзесяцігодзьдзі, каб канкураваць з Кітаем ці кім-небудзь яшчэ ў сьвеце. Я адданы супрацоўніцтву з Кітаем, дзе ён можа прасоўваць амэрыканскія інтарэсы і прыносіць карысьць сьвету. Але не памыляйцеся: як мы далі зразумець на мінулым тыдні, калі Кітай будзе пагражаць нашаму сувэрэнітэту, мы будзем дзейнічаць, каб абараніць нашу краіну. І мы гэта зрабілі», — падкрэсьліў ён.
4 лютага ЗША зьбілі кітайскі паветраны шар, які палічылі шпіёнскім.
Паводле прэзыдэнта ЗША, за апошнія два гады «дэмакратыі ўзмацніліся, а не аслаблі, аўтакратыі слабеюць, а не ўмацоўваюцца».
ГЛЯДЗІЦЕ ТАКСАМА:
ЗША зьбілі паветраны шар з Кітая над атлянтычным узьбярэжжамГЛЯДЗІЦЕ ТАКСАМА:
«Спадзяюся, ён усьвядоміць волю беларускага народу». Прадстаўніца Дзярждэпартамэнту ЗША пра саўдзел Лукашэнкі ў вайне і дыялёг з рэжымамВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.