Спачатку Макей заявіў пра «контратэрарыстычную апэрацыю»
Кіраўнік МЗС Беларусі Ўладзімер Макей у інтэрвію газэце «Известия» заявіў, што ўзброеныя сілы і спэцслужбы краіны «гатовы даць адпор на правакацыі з боку сумежных дзяржаў».
«Кіраўнік нашай краіны правёў шэраг нарад зь сілавымі структурамі, уведзены рэжым контратэрарыстычнай апэрацыі. Сапраўды, была інфармацыя пра тое, што з боку асобных сумежных дзяржаў плянуюцца правакацыі, зьвязаныя ледзь не з захопам асобных участкаў тэрыторыі Беларусі», — сказаў Уладзімер Макей.
Ён адзначыў, што ўзброеныя сілы Рэспублікі Беларусь і спэцслужбы «гатовы даць адпор на любыя правакацыі, якія могуць узьнікнуць з боку сумежных дзяржаў».
АПОШНЯЕ:
«Гэта сумесная апэрацыя КДБ і ФСБ супраць пляну «Перамога». Азараў пра «контратэрарыстычную апэрацыю» ў БеларусіПасьля Макей зьняпраўдзіў свае словы
Пазьней прэс-служба МЗС перадала новую заяву Макея, у якой ён не абвяргаў свае заявы «Известиям», але ўдакладніў іх.
«У рамках гэтага рэжыму ажыцьцяўляюцца ўзмоцнены кантроль за абстаноўкай, узмоцнены кантроль на вонкавым пэрымэтры межаў. А ці прывядзе гэта да напругі паміж Беларусьсю і суседнімі дзяржавамі? Дык давайце паглядзім, што адбываецца на заходніх межах, што адбываецца на паўднёвых», — адзначаецца ў заяве Макея.
Празь некаторы час Макей ужо ў размове з БелТА паведаміў, што ў інтэрвію «Известиям» ён гаварыў пра раней агучанае даручэньне Лукашэнкі правесьці «мерапрыемствы контратэрарыстычнага характару».
Выраз «контратэрарыстычная апэрацыя» ужо не згадваўся.
«Я бачыў, як выхапілі гэтую фразу і вакол яе за ноч раскруцілі кансьпіралягічныя тэорыі, — пракамэнтаваў Макей сваё ўчарашняе інтэрвію расейскаму выданьню. — Ня трэба падымаць ніякай панікі, ёсьць даручэньне прэзыдэнта, якое было агучана ў тым ліку публічна, правесьці мерапрыемствы контратэрарыстычнага характару. Менавіта пра гэта і ідзе размова. Менавіта аб гэтым на тыдні неаднаразова гаварыў і старшыня КДБ, і іншыя нашы службовыя асобы».
Лукашэнка заявіў пра «рэжым падвышанай тэрарыстычнай небясьпекі»
А пазьней Аляксандар Лукашэнка, знаходзячыся на саміце СНД ў Астане, даў яшчэ адзін варыятн назвы: ён заявіў, што ў Беларусі ўведзены рэжым падвышанай тэрарыстычнай небясьпекі, паведаміў ТАСС.
КДБ: контратэрарыстычнай апэрацыі не праводзілася
Тым часам у Камітэце дзяржбясьпекі БелТА паведамілі, што ў Беларусі ня ўведзены рэжым контратэрарыстычнай апэрацыі.
«На тэрыторыі Рэспублікі Беларусь контратэрарыстычная апэрацыя не праводзілася і цяпер не праводзіцца. Інфармацыя, якая распаўсюджваецца ў інтэрнэце, мае недакладны характар», — адзначылі ў КДБ.
Паводле ведамства, «контратэрарыстычная апэрацыя — гэта спэцыяльныя захады для спыненьня акту тэрарызму, мінімізацыі яго наступстваў, спыненьня дзейнасьці тэрарыстычнай арганізацыі, незаконнага ўзброенага фармаваньня, якія праводзяцца ў мэтах абароны інтарэсаў дзяржавы, гарантаваньня бясьпекі грамадзян і арганізацый, абясшкоджваньня тэрарыстаў».
ГЛЯДЗІЦЕ ТАКСАМА:
МУС Беларусі правяло вучэньні са зброяй і блёк-пастамі ў памежным з Украінай раёнеРэжым КТА ўводзіцца Камітэтам дзяржбясьпекі, сказалі ў ведамстве.
«Цяпер у рэспубліцы праводзяцца плянавыя навучальныя мерапрыемствы ў мэтах падтрыманьня высокага ўзроўню гатоўнасьці суб’ектаў барацьбы з тэрарызмам да выкананьня задач па прызначэньні. Прыкладам таму зьяўляюцца тактыка-спэцыяльныя вучэньні МУС, якія завяршыліся 12 кастрычніка ў Ельску Гомельскай вобласьці, якія праходзілі ў цесным узаемадзеяньні з прадстаўнікамі сілавога блёка і органаў мясцовай улады», — удакладнілі ў КДБ.
ГЛЯДЗІЦЕ ТАКСАМА:
Лукашэнка падпарадкаваў КДБ выключна сабеШто адбывалася раней
На працягу апошніх дзён Лукашэнка шмат пачаў гаварыць аб імаверным нападзе Ўкраіны:
«Нам трэба вызначыць, што яшчэ трэба зрабіць для ўмацаваньня бясьпекі нашай дзяржавы. З улікам становішча, якое хутка зьмяняецца. Учора ўжо па неафіцыйных каналах нас папярэдзілі аб нанясеньні ўдару па Беларусі з тэрыторыі Ўкраіны».
Раней, 4 і 10 кастрычніка, Аляксандар Лукашэнка правёў зь сілавікамі нарады, публічных заяў аб увядзеньні рэжыму контратэрарыстычнай апэрацыі агучана не было.
10 кастрычніка Лукашэнка заявіў аб разгортваньні супольнай з Расеяй групоўкі войскаў. Так, у выніку ў Беларусь прыбудуць тысячы расейскіх салдатаў.
Паводле міністра абароны Беларусі Віктара Хрэніна, задачы групоўка мае «выключна абаронныя». Ён адзначыў, усе захады, накіраваныя на «адэкватнае рэагаваньне на дзеяньні паблізу ад межаў».
ГЛЯДЗІЦЕ ТАКСАМА:
Лукашэнка даручыў КДБ правесьці «контратэрарыстычныя мерапрыемствы»Таксама на нарадзе з вайскоўцамі і сілавікамі Аляксандар Лукашэнка заявіў, што даручыў КДБ зрабіць неабходныя захады супраць тэрарызму.
«Я даручыў Мінабароны і Камітэту дзяржбясьпекі прапрацаваць магчымы комплекс мераў для кантролю за сытуацыяй і рэагаваньня на яе. Але яшчэ раз папярэджваю вас: мы годна адкажам любому суперніку. Мы да гэтага рыхтаваліся не адзін дзясятак гадоў. Калі трэба будзе, мы адкажам. Ня дай Бог, вядома», — цытавала Лукашэнку ягоная прэс-служба.
13 кастрычніка ў Астане на шостым саміце Нарады па ўзаемадзеяньні і мерах даверу ў Азіі Лукашэнка сярод іншага заявіў, што практыка «дзяржаўных пераваротаў» і «дыктат санацыйнага пакараньня» можа распаліць трэцюю сусьветную вайну, заявіў Аляксандар Лукашэнка.
ГЛЯДЗІЦЕ ТАКСАМА:
На саміце ў Астане Лукашэнка загаварыў пра трэцюю сусьветную вайнуВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.