«Наша войска, выведка і СБУ працягваюць актыўныя дзеяньні па некалькіх апэратыўных кірунках. Пасьпяхова працягваюць... У цяперашні час Узброеныя сілы вызвалілі і ўзялі пад кантроль больш за 30 населеных пунктаў у Харкаўскай вобласьці», — сказаў Зяленскі падчас штодзённага відэазвароту да ўкраінцаў увечары 9 верасьня.
8 верасьня прэзыдэнт Украіны Ўладзімір Зяленскі паведаміў, што агулам з 1 верасьня Ўзброеныя сілы вызвалілі больш за тысячу квадратных кілямэтраў тэрыторыі Ўкраіны.
ГЛЯДЗІЦЕ ТАКСАМА:
Генштаб Украіны: страты расейскіх войскаў набліжаюцца да 52 тысяч чалавек, украінцы вызвалілі 1000 км² тэрыторыіГенштаб Узброеных сіл Украіны ў ранішняй зводцы за 10 верасьня паведаміў, што за апошнія дні былі вызваленыя больш за тысячу квадратных кілямэтраў украінскай тэрыторыі.
У асобных напрамках Узброеным сілам Украіны ўдалося прасунуцца на глыбіню да 50 кілямэтраў, адзначаюць у Генштабе. Вызваленыя або ўзятыя пад кантроль больш за 30 населеных пунктаў у Харкаўскай вобласьці.
ISW: УСУ вызвалілі ў Харкаўскай вобласьці каля 2500 км² тэрыторыі
Паводле ацэнак брытанскага Інстытуту вывучэньня вайны (ISW), украінскія войскі ў ходзе контрнаступу ў Харкаўскай вобласьці па стане на канец дня 9 верасьня вызвалілі прыкладна 2500 квадратных кілямэтраў тэрыторыі.
Экспэрты ISW сьцьвярджаюць, што абарона расейскіх войскаў на поўнач і поўдзень ад горада Ізюм Харкаўскай вобласьці можа быць прарваная. Расейскае камандаваньне тэрмінова перакідвае ў рэгіён падмацаваньне, адзначаны рух ваенных эшалёнаў у напрамку Купянска — буйнога чыгуначнага вузла на ўсходзе Ўкраіны.
ГЛЯДЗІЦЕ ТАКСАМА:
Пэнтагон назваў «абнадзейлівымі» посьпехі Ўзброеных сіл Украіны каля Харкава і ХерсонаБрытанская выведка: УСУ адразаюць расейскія часткі пад Ізюмам і рыхтуюцца пазбавіць Расею лініі забесьпячэньня Данбасу
Сьвежую зводку аб сытуацыі на франтах у 199-ы дзень вайны МЗС абароны Вялікай Брытаніі прысьвяціла посьпехам наступальнай апэрацыі Ўзброеных сіл Украіны на поўдні краіны.
Як адзначаецца ў справаздачы брытанскай выведкі, украінскае войска перайшло ў контранаступ на поўдні Харкаўскай вобласьці 6 верасьня, перадавыя часткі прасунуліся на 50 км углыб тэрыторыі, якая раней утрымлівалася расейскімі сіламі на вузкім участку фронту.
Мяркуючы па ўсім, расейская армія была засьпета зьнянацку, адзначаецца ў паведамленьні. Сэктар утрымліваўся слаба, і ўкраінскія часткі ўзялі пад кантроль ці атачылі некалькі гарадоў.
Мяркуючы па ўсім, УСУ ўсё больш адразаюць расейскія сілы вакол Ізюма, адзначае выведка. Украінскія часткі зараз пагражаюць узяць горад Купянск; гэта стане сур’ёзным ударам для Расеі, таму што празь яго ляжаць шляхі забесьпячэньня лініі фронту на Данбасе.
Разам з працягам украінскіх наступальных апэрацый у Херсоне расейскі абарончы фронт адчувае ціск як на паўночным, так і на паўднёвым флянгах, гаворыцца ў паведамленьні.
ГЛЯДЗІЦЕ ТАКСАМА:
Кіраўнік ЦРУ: расейскае ўварваньне ва Ўкраіну выглядае «правалам»ГЛЯДЗІЦЕ ТАКСАМА:
Прэзыдэнт Украіны апублікаваў відэа з вайскоўцамі, якія паднялі над Балаклеяй украінскі сьцягВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.