Як паведаміў раніцай 9 верасьня Генштаб Узброеных сіл Украіны, за папярэднія суткі расейскае войска страціла каля 650 вайскоўцаў, такім чынам агульныя страты асабовага складу перавысілі 51,9 тыс. чалавек.
Генштаб таксама публікуе ўдакладненыя зьвесткі аб стратах расейскай тэхнікі:
- 2122 танкі (+10 за дзень),
- 4575 баявых браніраваных машын (+18),
- 1237 артылерыйскіх сыстэм (+11),
- 306 ракетных установак (+1),
- 159 сродкаў супрацьпаветранай абароны,
- 239 самалётаў,
- 211 верталётаў (+1),
- 888 апэратыўна-тактычных бесьпілётнікаў (+4),
- 214 крылатых ракет,
- 15 караблёў,
- 3399 машын і цыстэрнаў (+55),
- 114 адзінак спэцтэхнікі (+4).
Паводле Генштабу, найбольшыя страты расейскае войска панесла на Данецкім кірунку.
Паводле зьвестак Пэнтагону на 8 жніўня, з пачатку поўнамаштабнай вайны ва Ўкраіне загінулі або атрымалі раненьні 70-80 тысяч расейскіх вайскоўцаў.
Міністар абароны Вялікай Брытаніі Бэн Уолес 5 верасьня заявіў, што страты расейскага войска падчас поўнамаштабнага ўварваньня ва Ўкраіну дасягнулі 25 тысяч чалавек забітымі.
Масква не паведамляе пра свае страты ў вайне супраць Украіны. Апошні раз расейскі бок апублікаваў дадзеныя аб стратах расейскіх войскаў 25 сакавіка, у другі раз з пачатку вайны. Паводле тых зьвестак, 1351 расейскі вайсковец загінуў, яшчэ 3825 былі параненыя.
Праверыць дадзеныя аб стратах ва ўмовах баявых дзеяньняў немагчыма.
Узброеныя Сілы Ўкраіны, якія цяпер вядуць маштабны контранаступ на поўдні і ўсходзе краіны, з пачатку восені вызвалілі дзясяткі акупаваных расейскімі войскамі населеных пунктаў на тэрыторыі больш за тысячу квадратных кілямэтраў.
Пра гэта ў звароце да ўкраінцаў па выніках 197-га дня вайны заявіў прэзыдэнт Украіны Ўладзімір Зяленскі.
«У рамках абаронных апэрацый нашы героі вызвалілі ўжо дзясяткі населеных пунктаў. І сёньня гэты рух працягнуўся, ёсьць новыя вынікі. Усяго з 1 верасьня вызвалена больш за тысячу квадратных кілямэтраў нашай тэрыторыі. Дзякуй усім, хто гэта забясьпечыў!» — сказаў ён.
8 верасьня Украінскі Генштаб паведаміў пра вызваленьне больш як 20 населеных пунктаў Харкаўскай вобласьці, дадаўшы, што агульная плошча вернутых пад кантроль Украіны тэрыторый на Харкаўскім і Паўднёва-Бужанскім кірунках склала больш за 700 км².
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
