Мусіць, нечаканы эфэкт далі заходнія эканамічныя санкцыі супраць Расеі, якія могуць прывесьці да вельмі нэгатыўных наступстваў для эканомікі хаўрусьніка. У выніку можа атрымацца, што расейскі «Тытанік» пацягне за сабой у прорву і Беларусь. Расея, якая доўгі час была чыньнікам падтрымкі беларускай сацыяльнай мадэлі, ратавальнікам рэжыму Лукашэнкі, ператвараецца для яго ў крыніцу вялікіх праблемаў.
ГЛЯДЗІЦЕ ТАКСАМА:
Лукашэнка сказаў, што Беларусь ня будзе ваяваць з Украінай, але прывёў у гатоўнасьць СПА, каб «не дапусьціць удараў у сьпіну расейцам»Зьвяртае на сябе ўвагу тое, што Лукашэнка апраўдваўся. Ён імкнуўся даказаць, што Расея у саюзе зь Беларусьсю мае рацыю, пачынаючы вайну. А Ўкраіна сама вінаватая, што на яе напалі. Апраўдваўся за прысутнасьць расейскіх войскаў у Беларусі, іх выкарыстаньне дзеля вайны з паўднёвым суседам.
Калі чалавек апраўдваецца, то значыць, разумее, што трапіў у засаду. Бо ня толькі ўцягнуў краіну ў ваенную авантуру Рсаеі, што можа мець самыя нэгатыўныя наступствы. Мяняецца яго пэрсанальны статус. Адна рэч — вобраз жорсткага дыктатара, які парушае правы ўласных грамадзян. Іншая рэч — саўдзел у агрэсіі. Пуціна ўжо аб’яўляюць ваенным злачынцам. Апынуцца ў гэтым шэрагу — няўдзячная пэрспэктыва.
ГЛЯДЗІЦЕ ТАКСАМА:
Ці зайшлі беларускія войскі ва Ўкраіну? Што вядома на гэты момантВажна адзначыць, што цяпер Лукашэнка быў больш адназначным у заявах пра тое, што беларускае войска не ўдзельнічае і не зьбіраецца ўдзельнічаць у вайне на тэрыторыі Ўкраіны. Бо раней — напрыклад, 24 лютага — ён яшчэ казаў, што маўляў, паглядзім, калі будзе патрэбна, то мы будзем ваяваць на баку Расеі. Цяпер жа ён заявіў: «Мы і надалей не зьбіраемся ўдзельнічаць у гэтай спэцаперацыі ва Ўкраіне. Няма такой неабходнасьці».
Цікава, што цяпер Лукашэнка спрабуе атрымаць максымальны палітычны капітал з таго факту, што перамовы дэлегацыяў Расеі і Ўкраіны праходзяць на тэрыторыі Беларусі. Ён зноў, як пасьля Крыму, імкнецца надзець ня сябе тогу міратворца. Макей невыпадкова зьявіўся на Прыпяці, каб зафіксавацца перад тэлекамэрамі. А Лукашэнка на нарадзе доўга распавядаў, як лоўка арганізаваў гэтыя перамовы. Ён спадзяецца, што статус міратворца, пасярэдніка, мадэратара перамоваў павінен неяк зьмікшаваць вобраз агрэсара і дапаможа атрымаць індульгенцыю ад міжнароднай супольнасьці.
ГЛЯДЗІЦЕ ТАКСАМА:
Кіраўнік Bellingcat: «Стратэгія Крамля — зрабіць Беларусь злачынцам». ВІДЭАЯшчэ адна задача, якую ставіў Лукашэнка, — гэта неяк супакоіць грамадзтва. Маўляў, ваяваць ня будзем. Таму ня варта бегчы ў банкі, стаяць у чэргах, каб купляць валюту, усё будзе нармальна.
Аднак ёсьць адна фундамэнтальная праблема, якая не дазваляе вырашыць усе гэтыя праблемы. Лукашэнку ня вераць. Гэта тычыцца і беларусаў, і замежных суб’ектаў. І, здаецца, з гэтым ужо нічога нельга зрабіць.
Думкі, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.