«Мы заклікаем Расею неадкладна спыніць ваенны наступ, вывесьці ўсе свае сілы з Украіны і павярнуць з абранага ёю шляху агрэсіі, — гаворыцца ў заяве. — Мы шкадуем аб трагічнай гібелі людзей, вялізных чалавечых пакутах і разбурэньнях, выкліканых дзеяньнямі Расеі. Мір на Эўрапейскім кантынэнце ў корані парушаны. Сьвет прыцягне Расею, як і Беларусь, да адказнасьці за іх дзеяньні».
ГЛЯДЗІЦЕ ТАКСАМА: Байдэн ухваліў адпраўку яшчэ 7 тысяч вайскоўцаў у Нямеччыну«Рашэньне прэзыдэнта Пуціна напасьці на Украіну зьяўляецца страшнай стратэгічнай памылкай, за якую Расея будзе плаціць сур’ёзную цану, як эканамічна, так і палітычна, цягам многіх гадоў, — адзначаюць кіраўнікі дзяржаваў і ўрадаў NATO. — Мы будзем надалей аказваць палітычную і практычную падтрымку Ўкраіне і заклікаем іншых рабіць тое ж самае. Мы пацьвярджаем нашу непахісную падтрымку незалежнасьці, сувэрэнітэту і тэрытарыяльнай цэласьці Ўкраіны ў яе міжнародна прызнаных межах, уключаючы яе тэрытарыяльныя воды. Гэтая прынцыповая пазыцыя ніколі ня зьменіцца».
ГЛЯДЗІЦЕ ТАКСАМА: Захад не гатовы ваяваць за Ўкраіну, і Масква гэта разумее. Дыскусія аналітыкаўЗаява заканчваецца пералікам захадаў, якія зрабіў Паўночнаатлянтычны альянс у адказ на расейскі напад на Ўкраіну:
«Мы разьмясьцілі абарончыя наземныя і паветраныя сілы ва ўсходняй частцы альянсу, а марскія сродкі — ува ўсёй зоне NATO. Мы актывізавалі пляны абароны NATO, каб падрыхтавацца да рэагаваньня на шэраг непрадбачаных абставінаў і гарантаваць бясьпеку тэрыторыі альянсу, у тым ліку з выкарыстаньнем нашых сілаў рэагаваньня. Зараз мы робім значнае дадатковае абарончае разгортваньне сілаў ва ўсходняй частцы альянсу».
Сёньняшні саміт NATO пачаўся пасьля таго, як расейскія войскі дайшлі да Кіева, а прэзыдэнт Расеі Ўладзімір Пуцін заклікаў скінуць урад Украіны. У саміце празь відэасувязь узяў удзел і прэзыдэнт ЗША Джо Байдэн.
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.