Сьцісла:
- Лукашэнка ўсю адказнасьць за наступствы вайны ўскладае на Ўкраіну.
- Паступае інфармацыя, што ваенны напад на Ўкраіну ідзе і з тэрыторыі Беларусі.
- Інтэпрэтацыя апошніх падзеяў з вуснаў Лукашэнкі выглядае ўсё больш далёкай ад рэальнасьці.
- Лукашэнка імкнецца даказаць, што сытуацыя пад ягоным кантролем. Аднак яму ня вельмі ўдаецца.
Калі 16 лютага меркаваная вайна так і не пачалася, расейскія і беларускія дзяржаўныя мэдыя нямала зьдзекаваліся з гэтай нагоды. Маўляў, ці вартая цяпер даверу кожная інфармацыя ад ЗША, ці можна верыць амэрыканскай выведцы, прэзыдэнту Байдэну і інш. У сваю чаргу МЗС Расеі цьвёрда запэўнівала, што РФ не зьбіраецца нападаць на Ўкраіну.
ГЛЯДЗІЦЕ ТАКСАМА:
Расея напала на Ўкраіну, Лукашэнка падтрымаў агрэсію. Хроніка баявых дзеяньняў і сусьветная рэакцыя 24 лютагаПадзеі 24 лютага ўсё расставілі на свае месцы. Лукашэнка ня раз казаў, што Беларусь ня будзе ўдзельнічаць у вайне, калі на яе не нападуць.
22 лютага, выступаючы на ўрачыстым сходзе, прысьвечаным «Дню абаронцаў Айчыны», ён заявіў: «Запомніце: улада і я, як прэзыдэнт, буду рабіць усё для таго, каб Беларусь была мірным астраўком на гэтай звар’яцелай плянэце».
Нібы дзеля зьдзеку ў праект новай Канстытуцыі (ужо трэці дзень ідзе датэрміновае галасаваньне на рэфэрэндуме) быў унесены пункт: «Рэспубліка Беларусь выключае ваенную агрэсію з сваёй тэрыторыі ў адносінах да іншых дзяржаваў».
ГЛЯДЗІЦЕ ТАКСАМА:
Расея напала на Ўкраіну. Першыя фатаздымкіНа гэтым тле ўсё больш паступае інфармацыі, што ваенны напад на Ўкраіну ідзе ў тым ліку і з тэрыторыі Беларусі. Лукашэнка заявіў, што ён гэтага не выключае, але абверг, што ў гэтым удзельнічаюць беларускія вайскоўцы.
І яшчэ своеасаблівая інтэрпрэтацыя апошніх падзеяў з вуснаў Лукашэнкі.
Ён апавядае, што Пуцін паведаміў яму пра спэцапэрацыю Расеі на Данбасе. Маўляў, каб спыніць «генацыд» грамадзян, што жывуць у «ДНР» і «ЛНР».
Між тым расейская атака адбываецца і далёка ад Данбасу, на ўсёй мяжы Расеі і Ўкраіны і глыбока на ўкраінскай тэрыторыі. Ідзецца пра маштабную вайну, а не пра лякальную спэцапэрацыю.
І з выступу Пуціна вынікае, што Масква ставіць задачу «дэмілітарызацыі і дэнацыфікацыі» Ўкраіны, а таксама «прыцягнуць да «адказнасьці» ўкраінскіх кіраўнікоў. То бок гаворка пра зьмену дзяржаўнага ладу Украіны. Усё гэта не падобна да лякальнай спэцапэрацыі на Данбасе.
ГЛЯДЗІЦЕ ТАКСАМА:
Кіеў: Беларусь далучылася да агрэсіі Расеі супраць УкраіныЛукашэнка ўсю адказнасьць за наступствы вайны ўскладае на Ўкраіну. І гэта выглядае вельмі дзіўна. Напрыклад, ён кажа, што беларускія вайскоўцы напярэдадні папярэджвалі ўкраінскіх пра хуткі пачатак вайны. Але які гэта сакрэт? Пра пагрозу вайны ўжо некалькі месяцаў кажуць усе сусьветныя мэдыя.
Яшчэ адзін тэзіс. Лукашэнка фактычна абвінавачвае Кіеў у тым, што ён адмовіўся капітуляваць перад Расеяй. Маўляў, трэба было міністру абароны Ўкраіны патэлефанаваць у Маскву і пагадзіцца на расейскія ўмовы.
Усе гэтыя пасажы сьведчаць, у якой разгубленасьці знаходзіцца Лукашэнка. Ягоная аргумэнтацыя на карысьць Расеі выглядае ўсё больш далёкай ад рэальнасьці.
ГЛЯДЗІЦЕ ТАКСАМА:
Лукашэнка заявіў, што «калі неабходна будзе Расеі», беларускія войскі будуць ва ЎкраінеЛукашэнка заявіў, што ён сам папрасіў Пуціна, каб расейскія войскі засталіся ў Беларусі з прычыны пагрозы з боку Ўкраіны. Бо было шмат камэнтароў, што Лукашэнка ўжо не ўплывае на гэтую сытуацыю, ён не гаспадар тут, усё вырашае Пуцін. Таму ён імкнецца даказаць, што ўсё ня так, сытуацыя пад ягоным кантролем. Атрымалася ня вельмі. Бо калі кіраўнік просіць пра ўвод на сваю тэрыторыю замежных войскаў, каб абараніцца ад суседа, то які плён 27-гадовай дзейнасьці дзеля будаўніцтва беларускіх Узброеных сілаў і нацыянальнай дзяржаўнасьці?
ГЛЯДЗІЦЕ ТАКСАМА:
Лукашэнка: Беларускія войскі ня ўдзельнічаюць у апэрацыі на ДанбасеУ гэтым сэнсе вельмі цікавы сюжэт, калі Лукашэнка прызнаé, што расейскія вайскоўцы выкарыстоўваюць тэрыторыю Беларусі для нападу на Ўкраіну. І сам Лукашэнка, паводле ягоных словаў, даведаўся пра гэта са СМІ. Вось дык гаспадар, усемагутны дыктатар Беларусі! Як вынікае, краіна ператварылася ў прахадны двор для расейцаў? Нейкі генэрал тут робіць што хоча, нават не папярэдзіўшы Лукашэнку.
Калі Лукашэнка спрабуе неяк выкруціцца зь непрыемнай сытуацыі, ён абавязкова прагаворыцца.
Думкі, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.