Японія ўводзіць санкцыі супраць Расеі
Японія замарожвае выдачу віз грамадзянам Расеі, спыняе экспарт прадукцыі арганізацыям, зьвязаным з ваенным сэктарам, замарожвае актывы расейскіх фінансавых арганізацыяў, паведаміў прэм'ер краіны Фуміё Кісіда.
Зяленскі: я застаюся ў Кіеве, хоць я — «цэль нумар адзін»
Прэзыдэнт Украіны Уладзімір Зяленскі ў ноч на 25 лютага выступіў з чарговым відэазваротам, у якім падвёў вынікі першага дня расейскага ўварваньня ва Ўкраіну.
Зяленскі сказаў, што Ўзброеныя сілы краіны далі адпор ворагу.
Зяленскі таксама заявіў, што застаецца ў Кіеве, хаця, паводле яго слоў, «вораг акрэсьліў мяне як цэль нумар адзін». Ён дадаў, што ў Кіеве дзейнічаюць расейскія дывэрсійныя групы, таму неабходна выконваць камэнданцкую гадзіну.
Паводле слоў Зяленскага, ён вёў перамовы зь лідэрамі краін NATO аб уступленьні Ўкраіны ў альянс, аднак «яны ўсе баяцца». Як сказаў прэзыдэнт Украіны, ён не баіцца перамоваў з Расеяй, у тым ліку і аб нэўтральным статусе краіны, аднак патрабуе гарантый бясьпекі для Ўкраіны. Зяленскі дадаў, што ён гатовы да перамоваў, аднак цяпер лёс краіны залежыць ад войска.
АБСЭ вырашыла эвакуаваць сваіх супрацоўнікаў з Украіны
Генэральны сакратар АБСЭ Гэльга Шмід абвясьціла пра рашэньне часова эвакуаваць супрацоўнікаў міжнародных місій арганізацыі з Украіны.
«У сувязі з працягам баявых дзеяньняў і пагаршэньнем сытуацыі зь бясьпекай ва Ўкраіне, па ўзгадненьні зь дзейным старшынём я прыняла рашэньне як мага хутчэй часова эвакуаваць усіх міжнародных супрацоўнікаў з Украіны», – гаворыцца ў заяве, абнародаванай 24 лютага.
Шмід дадала, што гэтае рашэньне «далося нялёгка», і перамяшчэньне носіць часовы характар.
У Кіеве раздалі 10 тысяч аўтаматаў – прадстаўнік Зяленскага
Прадстаўнік прэзыдэнта Ўкраіны ў Канстытуцыйным судзе Фёдар Веніслаўскі паведаміў, што за апошнія гадзіны членам добраахвотных атрадаў тэрытарыяльнай абароны Кіеву было выдадзена 10 тысяч аўтаматаў.
Пра гэта ён паведаміў у эфіры тэлеканалу «Украіна 24».
«У Кіеве за апошнія гадзіны членам добраахвотных фарміраваньняў тэрытарыяльнай абароны выдадзена каля 10 тысяч аўтаматаў. Гэта людзі, якія самаарганізуюцца, маюць выразную арганізацыйную структуру, але падпарадкоўваюцца ўзброенаму камандаваньню войскаў тэрытарыяльнай абароны», – сказаў Веніслаўскі.
Паводле яго, цяпер горад патрулююць члены добраахвотных атрадаў.
Ва Ўкраіне 100 тысяч уцекачоў, — ААН
Паводле папярэдніх ацэнак Упраўленьня Вярхоўнага камісара ААН па справах уцекачоў, ужо прынамсі 100 000 чалавек спрабуюць пакінулі месцы пастаяннага пражываньня ва Ўкраіне, якая змагаецца з расейскай вайсковай агрэсіяй, паведамляе DPA.
Прадстаўніца УВКУ ААН заявіла ў Жэнэве ў чацьвер увечары, што агенцтва пакуль ня можа пацьвердзіць дакладныя лічбы, але заявіла, што відавочна было «значнае перамяшчэньне» ўнутры краіны і некаторыя перамяшчэньні праз межы.
Прэзыдэнт Малдовы Мая Санду напісала ўвечары, што больш за 4000 чалавек перасеклі мяжу з боку Ўкраіны ў чацьвер. Улады Малдовы стварылі два лягеры для прыёму украінскіх уцекачоў. «Нашы межы адкрыты для людзей з Украіны, якія маюць патрэбу ў бясьпечным знаходжаньні або хочуць прайсьці далей», — напісала яна.
ЗША ўвялі санкцыі супраць Хрэніна, Вальфовіча і беларускай вайсковай прамысловасьці
ЗША ўвялі санкцыі ў дачыненьні да шэрагу фізычных асоб, прадпрыемстваў і банкаў Беларусі за падтрымку рэжымам Лукашэнкі расейскай інтэрвэнцыі ва Ўкраіну. Усяго пад санкцыі патрапілі 24 фізычычныя і юрыдычныя асобы.
Санкцыі ўвялі ў дачыненьні да міністра абароны РБ Віктара Хрэніна, дзяржсакратара Савету бясьпекі Аляксандра Вальфовіча, кіраўніка Дзяржкамваенпраму Дзьмітрыя Пантуса, намесьніка старшыні Дзяржкамваенпраму Вячаслава Расалая, гендырэктара МЗКЦ Аляксея Рымашэўскага, ягонага намесьніка Аляксандра Вецяневіча і блізкага да Лукашэнкі бізнэсоўца Аляксандра Зайцава.
Пад санкцыямі апынуліся Дзяржаўны ваенна-прамысловы камітэт, Менскі завод колавых цягачоў, ААТ «558 авіяцыйны рамонтны завод», ААТ «КБ »Радар«, кіруючая кампаніі холдынгу »Сыстэмы радыёлякацыі«, ААТ »Інтэграл«, а таксама »Белспецзьнештэхніка«, ТАА » Абаронныя ініцыятывы», УП «Мінатор-Сэрвіс» і НДАТА «АКБ ТСП».
Зяленскі абвясьціў усеагульную мабілізацыю і чакае ад Эўропы моцных санкцыяў супраць агрэсара
Прэзыдэнт Украіны Ўладзімір Зяленскі падпісаў указ аб усеагульнай мабілізацыі – ва ўсіх 24 абласьцях і Кіеве, яна будзе праводзіцца на працягу 90 дзён.
Таксама Зяленскі заклікаў лідараў ЭЗ – удзельнікаў экстранага пасяджэньня Эўрапейскай рады – стаць на баку Ўкраіны і спыніць агрэсара.
Ён запатрабаваў, каб неадкладна былі прынятыя моцныя эканамічныя і фінансавыя санкцыі: адключэньне Расеі ад SWIFT, эмбарга на гандаль нафтай і газам, каб была аказаная дапамога ўкраінскай арміі зброяй і боепрыпасамі, падтрыманая міратворчая апэрацыя ААН.
«Ва Ўкраіне вырашаецца лёс Эўропы: калі Пуцін цяпер не атрымае годнага адпору, ён пойдзе далей», – папярэдзіў Уладзімір Зяленскі.
Сьвятлана Ціханоўская зьвярнулася да вайсковага кіраўніцтва Беларусі
Зьвяртаючыся да Міністэрства абароны, Генэральнага штабу і Рады Бясьпекі Беларусі, Ціханоўская адзначыла, што «рашэньне Лукашэнкі аб удзеле ў агрэсіі супраць Украіны ставіць пад пагрозу сувэрэнітэт Беларусі. Адмовіўшыся ад свайго абавязку абараняць краіну і яе народ, Лукашэнка зьняў з сябе паўнамоцтвы галоўнакамандуючага».
«Цяпер у вас ёсьць шанец пачаць дзейнічаць у інтарэсах сваёй краіны, Рэспублікі Беларусь. У вас ёсьць усе законныя падставы не выконваць злачынныя загады Аляксандра Лукашэнкі... У вас ёсьць усе законныя падставы спыніць чалавека, які сёньня зьдзейсьніў здраду Радзіме і беларускаму народу», – сказала яна.
Крэмль рыхтуе новую хвалю нападаў, у тым ліку авіяналёт – міністар абароны Ўкраіны
Крэмль рыхтуе новую хвалю нападаў, у тым ліку і авіяўдар, але ўкраінская армія гатовая сустрэць яго, заявіў міністар абароны Аляксей Рэзьнікаў.
Паводле яго, цяпер працягваюцца цяжкія баі ў Луганскай вобласьці, Сумскай вобласьці, на поўнач ад Кіева, складаная сытуацыя на поўдні.
«Аднак вораг не чакаў такога супраціву. Пад Харкавам яго спынілі», – сказаў Рэзьнікаў.
Украінскія дэсантнікі адстаялі аэрадром Гастомель непадалёк ад Кіеву
Дарадца міністра ўнутраных справаў Украіны Антон Герашчанка паведамляе, што ўкраінскія вайскоўцы адстаялі аэрадром Гастомель Кіеўскай вобласьці. За вайсковы аэрадром цэлы дзень вяліся баі, ён усяго за дзесяць кілямэтраў ад Кіеву.
Горад Марыўпаль пасьля сёньняшняга цяжкага абстрэлу таксама застаўся пад кантролем Украіны, паведамляе Генштаб Украіны.
Канада ўвяла дадатковыя санкцыі супраць Расеі
Канада ўводзіць дадатковыя санкцыі супраць 58 фізычных і юрыдычных асоб Расеі, у тым ліку прадстаўнікоў расейскай эліты і іх сямейнікаў. Пра гэта паведаміў прэм’ер-міністар Джастын Трудо. Пад санкцыі падпалі чальцы Савету бясьпекі РФ, у тым ліку міністар фінансаў Антон Сілуанаў, міністар абароны Сяргей Шайгу і міністар юстыцыі Канстанцін Чуйчанка. Канада таксама адменіць экспартныя дазволы, выдадзеныя Расеі.
Улады Канады 23 лютага з прычыны прызнаньня прэзыдэнтам Расеі Ўладзімірам Пуціным так званых «ДНР» і «ЛНР» увялі пакет санкцый. Урад забараніў грамадзянам і кампаніям Канады весьці якія-небудзь фінансавыя апэрацыі з «ДНР» і «ЛНР» і браць удзел у набыцьці сувэрэннага доўгу Расеі. Санкцыі датычаць двух дзяржаўных банкаў і дэпутатаў Дзяржаўнай думы, якія прагаласавалі за прызнаньне гэтых «рэспублік».
Супраць вайны выступілі рэпэры Аксімірон і Макс Корж, відэаблогер Птушкін
Вядомы расейскі рэпэр Аксімірон выступіў супраць вайны і сказаў, што адмяняе канцэрты ў Расеі. «Я супраць той вайны, якую разьвязвае Расея ва Ўкраіне, я лічу, што гэта катастрофа і злачынства», – сказаў ён.
Папулярны тэлевядоўца і відэаблогер Антон Птушкін заклікаў расіян выступіць супраць вайны: «Калі вы думаеце, што яна вас не датычыцца – вы памыляецеся: яна закране абсалютна ўсіх».
Рэпэр зь Беларусі Макс Корж пракамэнтаваў напад Расеі на Ўкраіну: «Асуджаю ўварваньне і бамбардзіроўку сувэрэннай дзяржавы. Гэта вайна, якая зьменіць жыцьцё кожнага назаўжды, усё роўна, дзе ты жывеш».
Малдова закрыла паветраную прастору і абвясьціла надзвычайнае становішча
Малдова 24 лютага абвясьціла аб закрыцьці паветранай прасторы праз вайну ў суседняй Украіне. Гэта адбылося неўзабаве пасьля таго, як прэзыдэнт Мая Санду абвясьціла, што Кішынэў уводзіць надзвычайнае становішча і гатовы прыняць дзясяткі тысяч людзей, якія прыбылі з суседняй Украіны пасьля нападу Расеі. «Мы будзем дапамагаць людзям, якія маюць патрэбу ў нашай дапамозе і падтрымцы», — заявіла Санду.
МУС Украіны паведамляе пра захоп украінскага вострава Зьмяіны ў Чорным моры
Пасьля абстрэлу Зьмяінага з караблёў і баявой авіяцыі расейскіх войскаў інфраструктура на востраве была разбураная, гаворыцца ў паведамленьні ТГ-каналу МУС Украіны.
Акрамя таго, страчана сувязь з памежнікамі, якія знаходзяцца на востраве. Паводле інфармацыі МУС, Зьмяіны востраў у Чорным моры быў захоплены.
Пазьней дарадца міністра ўнутраных справаў Украіны Антон Герашчанка паведаміў, што 13 памежнікаў са Зьмяінага загінулі.
Расейскі рынак акцый перажыў найбуйнейшы абвал за ўсю гісторыю
На тле ўварваньня Расеі ва Ўкраіну 24 лютага індэкс Маскоўскай біржы зьнізіўся на 33,3%, індэкс РТС — на 39,4%. Гэты абвал стаў рэкордным у гісторыі расейскага фондавага рынку, паведамляе «Інтэрфакс».
На гэты момант курс даляра вырас да 87,2 рубля (больш за 6 рублёў у параўнаньні з папярэднім аўкцыёнам), эўра — да 97,36 рубля (больш за 5,5 рубля ў параўнаньні з папярэднім днём).
Расейцы пагражаюць падарваць Запароскую АЭС — дэпутатка парлямэнту
Намесьніца старшыні парлямэнцкага камітэту ў пытаньнях нацыянальнай бясьпекі, абароны і выведкі Мар’яна Бязуглая заявіла, што ў Энэргадары расейскія войскі ўсталявалі гаўбіцы і пагражаюць падарваць Запароскую атамную электрастанцыю.
«Увага! Энэргадар — АЭС. Расейцы паставілі гаўбіцы і пагражаюць абстраляць атамную энэргастанцыю. Гэта будзе бяда для ўсёй Эўропы», — напісала Мар’яна Бязугла на сваёй старонцы ў Facebook.
Ва Ўкраіне працуе 4 атамныя электрастанцыі — Запароская (у Энэргадары), Паўднёваўкраінская, Ровенская АЭС (у Варашы) і Хмяльніцкая ў Няцешыне. Усяго ва Ўкраіне эксплюатуюць 15 энэргаблёкаў на ўсіх чатырох АЭС.
Раней прэм’ер-міністар Украіны Дзяніс Шмыгаль пацьвердзіў, што расейскія войскі захапілі Чарнобыльскую АЭС.
Байдэн абвясьціў пра новы пакет санкцый супраць Расеі
Гаворачы пра новы санкцыйны пакет, Байдэн сказаў сярод іншага:
- ЗША і саюзьнікі маюць намер абмежаваць імпарт у Расею высокатэхналягічнай прадукцыі на 50 працэнтаў.
- Захад абмяжуе магчымасці РФ весці апэрацыі ў цьвёрдай валюце: далярах, эўра, фунтах і енах.
- Санкцыі ЗША закрануць бонды найбуйнейшых расейскіх дзяржаўных кампаній.
- Санкцыі ЗША закрануць расейскую касьмічную праграму.
- Санкцыі будуць уведзеныя ў дачыненьні да ВГБ і шэрагу іншых буйных расейскіх банкаў, актывы якіх будуць замарожаныя.
«Гэтыя [санкцыі] настолькі аслабяць яго (Пуціна. — РС) краіну, што яму давядзецца рабіць складаны выбар: ці стаць другараднай краінай, ці зрабіць адпаведны выбар», — сказаў Байдэн.
Кіраваць рэгіёнамі Ўкраіны ва ўмовах вайны будуць вайсковыя адміністрацыі
Прэзыдэнт Украіны Ўладзімір Зяленскі падпісаў указ аб стварэньні вайсковых адміністрацыяў на базе абласных і раённых дзяржаўных адміністрацыяў. Паводле ўказу, гэта дапаможа больш эфэктыўна ажыцьцяўляць каардынацыю дзеяньняў мясцовых уладаў з Генэральным штабам Узброеных сіл і ўрадам Украіны ў сфэры абароны, грамадзкай бясьпекі і парадку.
Затрыманьні на антываенных акцыях у Расеі
У 48 расейскіх гарадах затрыманыя больш за 1083 чалавек, якія выйшлі на акцыі супраць уварваньня РФ ва Ўкраіну. Такія дадзеныя на 21:03 паводле менскага часу прыводзіць праваабарончы праект «АУС-Інфа».
У Маскве паліцыя затрымала ня менш як 520 чалавек.
Расея пра вайсковыя страты ўкраінцаў
Міністэрства абароны Расеі паведамляе, што ў выніку расейскіх удараў выведзеныя са строю 83 наземныя аб’екты вайсковай інфраструктуры Ўкраіны, зьбітыя два ўкраінскія Су-27, два Су-24, адзін верталёт і чатыры бесьпілётнікі «Байрактар ТБ-2».
Раней украінскі бок паведаміў пра 2 палонных расейцаў і 7 зьбітых самалётаў праціўніка. Паводле ўкраінскага штабу, у раёне гораду Шчасьце на Данбасе зьнішчылі больш як 50 расейскіх вайскоўцаў. Кіеў таксама кажа пра больш як сотню ахвяраў сярод украінскіх вайскоўцаў і цывільных.