Галоўнакамандуючы Ўзброенымі сіламі Ўкраіны пра наступ Расеі: «Бліцкрыгу ня выйшла. Умыюцца крывёй!»
Галоўнакамандуючы Ўзброенымі сіламі Ўкраіны Валеры Залужны падзякаваў усім абаронцам Украіны.
«Дзякую кожнаму з вас, хто сёньня ў шэрагах абараняе нашу зямлю ад расейскага акупанта. Дзякуй вашым родным, што чакаюць. Дзякую ўкраінскаму народу за давер, дапамогу і малітвы. Молімся за душы загінулых братоў і хуткае адужаньне параненых. Змагаемся далей! Увесь сэктар бясьпекі і абароны дае годны адпор. Будзе цяжка, але мы выстаім. Бліцкрыг расейцам ня ўдаўся. Умыюцца ўласнай крывёй!», — заявіў Валеры Залужны.
У адміністрацыі прэзыдэнта Ўкраіны пацьвердзілі, што расейскія войскі захапілі Чарнобыльскую АЭС
Інфармацыя аб захопе Чарнобыльскай АЭС пацьвердзілася, заявіў у камэнтары выданьню «Українська правда» дарадца кіраўніка адміністрацыі прэзыдэнта Ўкраіны Міхаіл Падаляк.
«Пасьля жорсткага бою наш кантроль над Чарнобыльскай АЭС быў страчаны. Стан былой Чарнобыльскай АЭС, канфайнмэнтаў і сховішчаў ядзерных адыходаў невядомы. Пасьля абсалютна бессэнсоўнага нападу расейцаў на гэтым кірунку немагчыма казаць, што ЧАЭС у бясьпецы. Гэта адна з самых сур’ёзных пагрозаў Эўропе сёньня», — паведаміў Падаляк.
Паводле кіраўніцтва Чарнобыльскай АЭС, ахвяраў і пацярпелых няма.
Тое, што Чарнобыльскую зону адчужэньня і ЧАЭС узяла пад кантроль армія РФ, пацьвердзіў і прэм’ер-міністар Украіны Шмыгаль на брыфінгу ўраду.
МЗС Беларусі: З Украіны выехалі «больш за 50» беларускіх грамадзян
Міністэрства замежных справаў Беларусі паведаміла, што на сёньня, паводле яго ацэнкі, на тэрыторыі Ўкраіны знаходзяцца некалькі тысяч беларускіх грамадзян.
«Цяпер грамадзяне эвакууюцца праз пункты пропуску на беларуска-ўкраінскай мяжы Новая Рудня і Новая Гута, а таксама праз тэрыторыю сумежнай Украіне Малдовы. Паводле наяўнай інфармацыі, мяжу на гэты час па названых маршрутах перасеклі больш за 50 чалавек», — адзначае беларускае МЗС.
МЗС дадае, што ў сувязі з сытуацыяй ва Ўкраіне амбасада Беларусі ў Кіеве і Галоўнае консульскае ўпраўленьне МЗС пераведзеныя на кругласуткавы рэжым работы.
Лукашэнка абвясьціў прызыў афіцэраў запасу
Аляксандар Лукашэнка падпісаў 24 лютага ўказ № 68 «Аб прызыве афіцэраў запасу на вайсковую службу».
Дакумэнт прадугледжвае прызыў у 2022 годзе ва Ўзброеныя сілы да 150 мужчын ва ўзросьце да 27 гадоў, якія прайшлі навучаньне на вайсковых катэдрах або факультэтах, якія маюць вайсковае званьне афіцэра і залічаныя ў запас, — паведамляе прэс-служба Лукашэнкі.
Прэс-служба цьвердзіць, што «мерапрыемствы, прадугледжаныя Указам, праводзяцца Ўзброенымі Сіламі Беларусі штогод на плянавай аснове і не зьвязаныя з становішчам у рэгіёне». Прызыў нібыта дасьць магчымасьць «забясьпечыць якаснае рыхтаваньне мабілізацыйнага рэзэрву».
Зяленскі запатрабаваў ад ЭЗ устанавіць беспалётную зону над Украінай
Прэзыдэнт Украіны Ўладзімір Зяленскі запатрабаваў ад ЭЗ прыняць меры ў сувязі з агрэсіяй Расеі супраць Украіны, у тым ліку адключыць Расею ад міжнароднай міжбанкаўскай платнай сыстэмы SWIFT і ўстанавіць беспалётную зону над украінскай тэрыторыяй.
Балістычныя ракеты, захоп Чарнобыльскай АЭС. Што вядома пра ўдзел Беларусі ў вайне супраць Украіны
Лукашэнка заяўляе, што беларускія вайскоўцы ў канфлікце пакуль ня ўдзельнічаюць, аднак могуць далучыцца да яго, «калі будзе патрэбна». Аднак украінскі бок сьцьвярджае, што Беларусь далучылася да агрэсіі Расеі супраць Украіны. Свабода падсумавала, што вядома на гэты момант. Чытаць>>>
У Кіеве і іншых гарадах Украіны ўвядуць камэнданцкую гадзіну
Мэр Кіева Віталь Клічко абвясьціў аб увядзеньні ў сталіцы камэнданцкай гадзіны. Яна будзе дзейнічаць з 22.00 да 7.00. У гэты час ня будзе працаваць грамадзкі транспарт, а мэтро будуць выкарыстоўваць як бомбасховішча. Камэнданкую гадзіну ўвялі ў Днепрапятроўскай, Харкаўскай,Чаркаскай, Віньніцкай, Жытомірскай, Запароскай, Адэскай і Палтаўскай абласьцях. Бліжэйшым часам пра ўвядзеньне камэнданцкай гадзіны абвесьцяць мясцовыя ўлады Роўна.
У Маскве 700 чалавек выйшлі на акцыю супраць вайны, людзей затрымліваюць
На Страсным бульвары ў Маскве сабраліся каля 700 чалавек, яны скандуюць «Не вайне!» і «Украіна, мы з табой!». У цэнтры гораду заўважылі шмат спэцтэхнікі і байцоў Расейскай гвардыі. Затрымалі некалькі чалавек, у тым ліку супрацоўнікаў СМІ, сярод іх трое карэспандэнтаў расейскай службы Радыё Свабода.
МЗС Беларусі: З Украіны выехалі «больш за 50» беларускіх грамадзян
Міністэрства замежных справаў Беларусі паведаміла, што на сёньня, паводле яго ацэнкі, на тэрыторыі Ўкраіны знаходзяцца некалькі тысяч беларускіх грамадзянаў.
«Цяпер грамадзяне эвакууюцца праз пункты пропуску на беларуска-ўкраінскай мяжы Новая Рудня і Новая Гута, а таксама праз тэрыторыю сумежнай Украіне Малдовы. Паводле наяўнай інфармацыі, мяжу на гэты час названымі маршрутамі перасеклі больш за 50 чалавек», — адзначае беларускае МЗС.
МЗС дадае, што ў сувязі з сытуацыяй ва Ўкраіне амбасада Беларусі ў Кіеве і Галоўнае консульскае ўпраўленьне МЗС пераведзеныя на кругласуткавы рэжым работы.
Гомельскія шпіталі прымаюць параненых расейскіх салдатаў
Гомельскі абласны шпіталь сёньня прымаў параненых расейцаў. Як паведамляюць мэдыкі, тыя былі параненыя ў раёне пункту пропуску Весялоўка — Сенькаўка на беларуска-ўкраінскім памежжы. Крыніцы Свабоды паведамляюць, што для расейскіх вайскоўцаў вызваляюць ложкі ў шпіталі ў Касьцюкоўцы пад Гомлем.
Разьведвальны ўзвод 74 мотастралковай брыгады здаўся ў палон украінскім вайскоўцам пад Чарнігавам
«Ніхто ня думаў, што мы едзем забіваць. Ваяваць мы не зьбіраліся, мы зьбіралі інфармацыю», — заявіў ён у размове з украінскімі вайскоўцамі.
Расейскія войскі захапілі частку Херсонскай вобласьці
24 лютага расейскія войскі захапілі шэраг паселішчаў у Херсонскай вобласьці, паведамляе прэс-служба Херсонскай абласной дзяржаўнай адміністрацыі. Сярод захопленых гарадоў — Генічаск, Алешкі.
Пасол Украіны ў Беларусі: «Беларусь далучылася да дзеяньняў Расеі супраць Украіны»
Ігар Кізім напісаў у Фэйсбуку з спасылкай на афіцыйныя ўкраінскія крыніцы: «На жаль, Беларусь далучылася да дзеяньняў Расеі супраць Украіны».
«Хоць беларускія ўлады маўчаць. З тэрыторыі Беларусі папаўзьлі „зялёныя чалавечкі“, паляцелі ракеты (расейскія), якія былі ў Беларусі нібы для абароны, пайшла „зялёная“ (без апазнавальных знакаў) тэхніка. Напаўшы на Ўкраіну, Расея аб’явіла вайну славянскаму сьвету. Усе славянскія дзяржавы ад Балтыйскага да Чорнага мора і Балканаў (акрамя Беларусі) асудзілі дзеяньні Крамля. Думаю, гэта памылка так званага „русского мира“ і яго прыхільнікаў, і кошт гэтай памылкі будзе высокім для ўсіх нас. І забудзьцеся пра „братэрскія“ народы. Расея зрабіла ўсё, каб забіць гэтае „братэрства“ надоўга».
Вялікая колькасьць расейскай вайсковай тэхнікі з пазнакай «Z» рухаецца з Крыму на мацерыковую Ўкраіну
Фота і відэа апублікавала агенцтва Reuters.
Эўразьвяз асудзіў Беларусь як саўдзельніцу агрэсіі
«Эўрапейская рада таксама асуджае ўдзел Беларусі ў гэтай агрэсіі супраць Украіны і заклікае яе выконваць свае міжнародныя абавязаньні», — гаворыцца ў заяве Эўрапейскай рады.
Заява заклікае чальцоў Эўразьвязу хутка падрыхтаваць новы пакет санкцый супраць агрэсара, які закране і Беларусь.
«ЭЗ зьяднаны ў сваёй салідарнасьці з Украінай і будзе працягваць падтрымліваць Украіну і яе народ разам з сваімі міжнароднымі партнэрамі, у тым ліку праз дадатковую палітычную, фінансавую і гуманітарную падтрымку і міжнародную канфэрэнцыю донараў», — адзначае Эўрапейская рада.
МУС Украіны: за дзень 392 абстрэлы, зьнішчаныя 6 мастоў, ідуць зацятыя баі
Дарадца Міністэрства ўнутраных справаў Украіны Вадзім Дзенісенка заявіў, што ўва ўсіх гарадах Украіны, абстраляных з паветра, працягваюцца баявыя дзеяньні.
«Усяго адбылося 392 абстрэлы, зьнішчылі 6 мастоў. Цяпер зацятыя баі ідуць за Чарнобыльскую зону. Напружаная сытуацыя ў Гастомелі пад Кіевам, дзе расейскія акупанты спрабуюць захапіць наш аэрапорт. Працягваюцца баі пад Сумамі, на Херсоншчыне», — заявіў Вадзім Дзенісенка.
Мітрапаліт УПЦ Маскоўскага патрыярхату Ануфрый стаў на бок Украіны і назваў дзеяньні Пуціна «Каінавым грахом»
Кіраўнік Украінскай праваслаўнай царквы Маскоўскага патрыярхату мітрапаліт Ануфрый заклікаў прэзыдэнта Расеі Ўладзіміра Пуціна неадкладна спыніць «братазабойчую вайну» і выказаў падтрымку ўкраінскім вайскоўцам.
«Украінскі і расейскі народы выйшлі з Дняпроўскай купелі хрышчэньня, і вайна паміж гэтымі народамі — гэта паўтарэньне граху Каіна, які з зайздрасьці забіў свайго роднага брата. Такая вайна ня мае апраўданьня ні ў Бога, ні ў людзей», — сказаў мітрапаліт Ануфрый.
Зяленскі: расейскія вайскоўцы хочуць захапіць ЧАЭС
«У Чарнобыльскую зону ўвайшлі войскі акупантаў з тэрыторыі Беларусі», — паведаміў намесьнік міністра унутраных спраў Украіны Антон Герашчанка.
Як выглядае мапа расейскай агрэсіі супраць Украіны
Нямецкі журналіст Юліян Рэпке апублікаваў мапу расейскай агрэсіі супраць Украіны, якая, зь ягоных словаў, грунтуецца на геалякацыі баёў і перамяшчэньня войскаў, а таксама на справаздачах украінскай арміі.