Раніцай паведамлялася, што Барысаў быў затрыманы невядомымі. Пазьней першы намесьнік старшыні партыі Аляксей Сігаеў распавёў БелаПАН, што Старшыня Беларускай сацыял-дэмакратычнай партыі (Грамада) Ігар Барысаў знаходзіцца ва ЎУС Партызанскага раёна Менску.
ГЛЯДЗІЦЕ ТАКСАМА: У Менску невядомыя затрымалі лідэра сацыял-дэмакратаў Ігара Барысава«Затрымалі з „маскі-шоў“, забралі з машыны, калі яны зь сям’ёй ехалі ў краму», — распавёў Сігаеў.
«Мы ехалі па вуліцы Геалягічнай, калі нас пачаў падразаць зьлева жоўты мікрааўтобус. Спыніліся. Адтуль выскачылі людзі ў цывільным, у чорных масках, выцягнулі Ігара з машыны, напалохалі чатырохгадовае дзіця», — паведаміла БелаПАН падрабязнасьці затрыманьня жонка Ігара Алена Барысава.
Паводле яе, муж не супраціўляўся і нават падняў рукі. Барысава таксама паведаміла, што праз 20-30 хвілін ён патэлефанаваў і сказаў, што дастаўлены ў Партызанскі РУУС. Яна зьвярнулася ў УУС, каб выступаць у якасьці прадстаўніка мужа, бо мае юрыдычную адукацыю.
«Інфармацыі ніхто не дае, і да мужа не дапусьцілі. На падставе чаго яго затрымалі, невядома», — сказала Барысава.
ГЛЯДЗІЦЕ ТАКСАМА: З магілёўскага заводу звольнілі заяўніка мітынгу да Дня ВоліУвечары жонцы паведамілі, што Ігар Барысаў затрыманы ў рамках адміністрацыйнага працэсу і цяпер у ізалятары на Акрэсьціна.
9 сакавіка Беларуская сацыял-дэмакратычная партыя (Грамада), грамадзкае абʼяднаньне «БНФ Адраджэньне» і рух «За Свабоду» падалі ў Менгарвыканкам заяўку на правядзеньне масавага мерапрыемства, прымеркаванага да чарговых угодкаў абвяшчэньня Беларускай Народнай Рэспублікі (Дзень Волі).
«Дату, час і месца я вам не скажу, таму што раней гэта было фармальнай прычынай для адмовы ў дазволе мерапрыемства», — заявіў БелаПАН Ігар Барысаў, пацьвердзіўшы сам факт падачы заяўкі.