На цырымоніі ўзнагароджаньня Алесь Бяляцкі заклікаў міжнародную супольнасьць да падтрымкі дэмакратыі ў Беларусі, каб краіна «не ператварылася ў ГУЛАГ», а таксама згадаў ціск на праваабаронцаў з боку міліцыі, перадае сайт «Вясны».
Узнагароду прысудзілі за вялікую ролю ў барацьбе за дэмакратыю і правы чалавека ў Беларусі. Цырымонія адбылася 3 сьнежня ў Стакгольме.
Алесь Бяляцкі заявіў, што ўручэнне гэтай узнагароды адбываецца ў той час, калі ў Беларусі ідзе мірная рэвалюцыя:
«Паўгода беларускае грамадзтва вядзе захапляльную барацьбу за правы чалавека, дэмакратыю і справядлівасьць, барацьбу за правы называцца народам, як казаў наш клясык Янка Купала, барацьбу з апошнім дыктарам Эўропы і яго рэжымам, які ён будаваў больш 26 гадоў. І гэта барацьба не праходзіць без ахвяр.
У гэты няпросты для нас час прэстыжная прэмія зьяўляецца для нас, праваабаронцаў «Вясны», моцнай маральнай падтрымкай. Гэта ясны сыгнал беларускім уладам пра тое, што сьвет ніколі не будзе мірыцца з масавымі парушэньнямі правоў чалавека. Калі мы ня хочам, каб Беларусь ператварылася ў ГУЛАГ, трэба падтрымліваць беларускі народ сёньня і цяпер».
Акрамя таго, старшыня Праваабарончага цэнтру «Вясна» сказаў, што ў адрас цэнтру пастаянна паступаюць пагрозы з боку спэцпадразьдзяленьня міліцыі. Нягледзячы на пагрозы, праваабаронцы не спыняюць дапамогі рэпрэсаваным.
У 2020 годзе 18 сяброў і валянтэраў «Вясны» арыштоўвалі і затрымлівалі. У кастрычніку Марына Кастылянчанка правяла ў турме месяц. Трэці месяц пад сьледзтвам каардынатарка валянтэрскай службы «Вясны» Марфа Рабкова і валянтэр Андрэй Чапюк. Іх затрымалі за тое, што яны арганізоўвалі прадуктовыя перадачы для палітычных зьняволеных у Менску, і завялі крымінальную справу.
Акрамя праваабаронцаў зь Беларусі, сёлета ўзнагароду атрымалі іранская адвакатка Насрын Сатудэх, амэрыканскі актывіст руху за грамадзянскія правы Браян Стывэнсан і экаактывістка Лоці Канінгэм Рэн зь Нікарагуа.
ГЛЯДЗІЦЕ ТАКСАМА:
Алесь Бяляцкі: Адказнасьць за сьмерць Рамана Бандарэнкі ляжыць на МУС«Такога ў гісторыі Беларусі не было са сталінскіх часоў». Алесь Бяляцкі пра крымінальную справу за «Дзяды»«Самотны рыцар з замкаў палескіх балот». Алесь Бяляцкі пра кнігу «Спадар Свабода» Сяргея АстраўцоваПрэмію імя Сахарава атрымала беларуская апазыцыя, прадстаўленая Каардынацыйнаю радаюПраваабарончы цэнтар «Вясна» і яго старшыня Алесь Бяляцкі сталі ляўрэатамі «альтэрнатыўнай Нобэлеўскай прэміі»