Аляксандар Лукашэнка сабраў 19 сакавіка нараду, прысьвечаную эпідэмічнай сытуацыі. На ёй ён паўтарыў ранейшыя «парады», як змагацца з COVID-19 — каранавірус нібыта можна «труціць» гарэлкай і лазьняй.
«Я некалі абмовіўся аб тым, што людзям трэба, каб змагацца з рознымі вірусамі, у тым ліку і з гэтым, часьцей хадзіць у сухую лазьню, — заявіў Аляксандар Лукашэнка. — Паколькі COVID-19 ня любіць высокіх тэмпэратураў і пры плюс шасьцідзесяці, як мяне праінфармавалі спэцыялісты, гіне».
ГЛЯДЗІЦЕ ТАКСАМА: «Гэта псыхоз». Лукашэнка патлумачыў, чаму Беларусь ня ўводзіць карантыну
Чаму лазьня не ратуе ад каранавірусу. Тлумачыць лекар
Зьміцер Салошкін
Доктар-рэаніматоляг Зьміцер Салошкін, які нядаўна падрабязна расказваў, як засьцерагчыся ад каранавірусу, растлумачыў Свабодзе, чаму нават самая гарачая саўна ня лекуе ад COVID-19:
«Калі вы седзіце ў саўне, а чалавек перад вамі кашлянуў кудысьці на паліцу, тады так, калі там сухое паветра тэмпэратуры 100 градусаў, вірус загіне досыць хутка, — кажа ён. — Але тэмпэратура цела чалавека ўсярэдзіне — гэта адна з самых жорсткіх канстантаў. І нават калі самая моцная хвароба, гэта 40 градусаў.
Нават калі вы седзіце ў саўне, тэмпэратура цела застаецца стабільнай. Так што носьбіт гэтага вірусу, і пасядзеўшы ў саўне, выйдзе і зноў будзе кашляць і распаўсюджваць вірус.
Саўна за кошт тэмпэратуры можа хіба што „аўтаматычна“ праводзіць дэзынфэкцыю, але ў целе чалавека нельга дасягнуць такой тэмпэратуры».
Лекар дадае: і іншыя «народныя сродкі», як часнык і цыбуля, ня лічацца дзейнымі, а сапраўдныя рэкамэндацыі супраць COVID-19 даступныя і даволі простыя.
Што кажуць у Сусьветнай арганізацыі здароўя
Насамрэч у Сусьветнай арганізацыі здароўя няма дасьледаваньняў, якія б паказвалі, што вірус SARS-CoV-2 гіне пры тэмпэратуры 60 градусаў. Вядома толькі, што падобны (але не цяперашні) вірус SARS хутчэй (але не адразу і ня цалкам) гіне пры тэмпэратурах звыш 56°С (аднак ня ў целе чалавека, вакол якога такая тэмпэратура паветра, а пры непасрэдным нагрэве саміх вірусных часьцінак).
Таксама Лукашэнка 19 сакавіка параіў мыць рукі гарэлкай і «ўнутр 100 грамаў». Але гарэлка недастаткова эфэктыўная для ачышчэньня рук і зусім неэфэктыўная супраць вірусаў у арганізьме. Рукі рэкамэндуюць мыць сродкамі дэзынфэкцыі, якія ўтрымліваюць ня менш за 60% сьпірту, або проста мылам.
ГЛЯДЗІЦЕ ТАКСАМА: Чаму мыла працуе лепей за іншыя сродкі дэзынфэкцыіКаранавірус у Беларусі і ў сьвеце. Як разьвіваюцца падзеі >>
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.