У пачатку 2020 году Беларусь з афіцыйным візытам мае наведаць дзяржаўны сакратар Злучаных Штатаў Майк Пампэо, паведамляе Foreign Policy.
Паводле выданьня, афіцыйныя прадстаўнікі ЗША заяўляюць, што дзяржсакратар ЗША Майк Пампэо «возьме прыклад з тагачаснага дарадцы прэзыдэнта ЗША Дональда Трампа Джона Болтана», які наведаў Беларусь у жніўні 2019 году, і таксама прыедзе ў Менск у студзені.
Беларускія СМІ са спасылкамі на ўласныя крыніцы таксама пішуць пра такія пляны. Афіцыйных пацьверджаньняў (або абвяржэньняў) візыту з амэрыканскага ці беларускага боку пакуль не было.
Як адзначае Foreign Policy, «цяпер чакаецца, што Злучаныя Штаты адновяць дыпляматычныя зносіны зь Беларусьсю, даслаўшы амбасадара ў Менск упершыню за больш як дзесяцігодзьдзе – нават нягледзячы на тое, што прэзыдэнт Расеі Ўладзімір Пуцін спрабуе падпарадкаваць яе».
Гэта будзе другі ў гісторыі незалежнай Беларусі візыт Дзяржаўнага сакратара ЗША (фактычна гэтая пасада аналягічная міністру замежных справаў). Але дзяржсакратар ня самы высокапастаўлены амэрыканскі госьць у гісторыі Беларусі: у 1994 годзе Беларусь наведаў прэзыдэнт ЗША Біл Клінтан. Ды такія візыты здараюцца нячаста.
ГЛЯДЗІЦЕ ТАКСАМА: Лукашэнка згадаў, як прэзыдэнта ЗША хацелі зрабіць кіраўніком Саюзнай дзяржавы29 жніўня Беларусь наведаў дарадца прэзыдэнта ЗША ў нацыянальнай бясьпецы Джон Болтан — самы высокапастаўлены прадстаўнік амэрыканскіх уладаў з усіх, якія пабывалі ў краіне за апошнія 20 гадоў. Болтан сустрэўся з Аляксандрам Лукашэнкам і падчас сустрэчы заявіў, што Вашынгтон спадзяецца знайсьці агульную мову зь Менскам у пытаньнях выкананьня правоў чалавека і нераспаўсюджаньня зброі. Лукашэнка адзначыў, што Беларусь заўсёды выступала за нармалізацыю дачыненьняў з ЗША і хоча пачаць з чыстай старонкі.
А 17 верасьня ў Беларусь прыляцеў намесьнік дзяржаўнага сакратара Дэвід Гэйл. На сустрэчы з Аляксандрам Лукашэнкам пра рашэньне вярнуць амэрыканскага амбасадара ў Беларусь.
Беларусь выслала амбасадара ЗША ў 2008 годзе пасьля таго, як Вашынгтон наклаў на яе санкцыі за парушэньні правоў чалавека.
ГЛЯДЗІЦЕ ТАКСАМА: 11 год без амбасадараў. Як мяняліся дыпляматычныя стасункі паміж ЗША і Беларусьсю